Ադրբեջանցի իրավապաշտպան Լեյլա Յունուսը և նրա ամուսինը՝ կոնֆլիկտաբան Արիֆ Յունուսը, մեղադրվել են առանձին քաղաքացիների հետ գաղտնի համագործակցության մեջ, որի նպատակը եղել է Հայաստանի հատուկ ծառայությունների աշխատակիցների հետ գործողությունների համակարգումը: Այս մասին, ինչպես հաղորդում է ադրբեջանական Trend գործակալությունը, ասվում է Ադրբեջանի Դատախազության և Ազգային անվտանգության նախարարության համատեղ հայտարարության մեջ:
«Լեյլա և Արիֆ Յունուսները Ադրբեջանի առանձին քաղաքացիների (որոնց անուններն առայժմ չեն բարձրաձայնվում) կապել են Հայաստանի հատուկ ծառայությունների հետ՝ գաղտնի համագործակցության մղելու համար, կատարել են իրենց վրա դրված կոնկրետ հանձնարարություններ՝ երկրում ընթացիկ հասարակական-քաղաքական մթնոլորտի վերաբերյալ տեղեկատվություն հավաքելու և դա Ադրբեջանի դեմ օգտագործելու, ինչպես նաև արդյունաբերության, էներգետիկայի, ռազմատեխնիկական ապահովվածության և օկուպացված տարածքները ազատելու դեպքում Լեռնային Ղարաբաղի ռեժիմն ընդունելու օգտին քարոզչության ոլորտներում»,- ասվում է հաղորդագրության մեջ:
Հիշեցնենք, ավելի վաղ հաղորդվում էր, որ Լեյլա Յունուսը և նրա ամուսինը՝ կոնֆլիկտաբան Արիֆ Յունուսը ձերբակալվել են: Արիֆ Յունուսից երկրից դուրս չգալու ստորագրություն է վերցվել, իսկ Լեյլա Յունուսը Բաքու քաղաքի Նասիմի շրջանային դատարանի որոշմամբ կարող է կալանքի տակ հայտնվել:
Ավելի վաղ՝ ապրիլի 18-ին, Հայաստանի հատուկ ծառայությունների հետ համագորակցության մեղադրանքով ձերբակալվել էր մեկ այլ հայտնի լրագրող Ռաուֆ Միրկադիրովը: Վերջինիս մեղադրանք էր ներկայացվել Ադրբեջանի քրեական օրենսգրքի 274-րդ հոդվածով` պետական դավաճանություն, մասնավորապես` մեղադրանք լրտեսության մեջ:
