Թուրքիայի իշխող «Արդարություն և զարգացում» կուսակցությունում լուրջ հակամարտություն է առաջացել: Կուսակցության առաջնորդը՝ երկրի վարչապետ Ռեջեփ Թայիփ Էրդողանը, ով հաղթանակ է ակնկալում օգոստոսի 10-ին կայանալիք նախագահական ընտրություններում, զգալիորեն կորցնում է մոտ շրջապատի մի զանգվածի աջակցությունը: Կուսակցությունից հեռացել է վարչապետի մոտ դաշնակիցներից մեկը՝ Դենգիր Ֆըրաթը: Փորձագետները համոզված են, որ ընտրություններից հետո երկրում անխուսափելիորեն նոր քաղաքական ճգնաժամ կծագի: Այս մասին գրում է Kommersant-ը:
Ֆըրաթի հեռանալու մասին հայտնի է դարձել երեկ: Նա կուսակցության հիմնադիրներից մեկն է ու կուսակցության նախկին փոխնախագահը: Փորձագետների գնահատականներով՝ կուսակցության շարքերը լքելու քաղաքական գործչի որոշումը ցույց է տալիս կուսակցությունում պառակտման խորությունը՝ այն պահին, երբ նախագահական ընտրություններին մնացել է երկու շաբաթից քիչ ժամանակ: Ֆըրաթը հայտարարել է, որ նախընտրական արշավի մնացյալ ժամկետում մտադիր է աջակցել ոչ թե Էրդողանին, այլ նրա մրցակցին՝ քրդամետ թեկնածու Սելահաթին Դեմիրթաշին:
«Անդամակցությունը «Արդարություն և զարգացում» կուսակցությունում ինձ թույլ չէր տալիս բացահայտ հանդես գալ ընդդեմ այն ամենի, ինչի հետ համաձայն չեմ,-պարզաբանել է Ֆըրաթը:- Սակայն լռել այն պայմաններում, որոնք ստեղծվել են երկրում, կնշանակեր ստանձնել պատասխանատվության անտանելի բեռ: Այդ իսկ պատճառով ես՝ կուսակցության հիմնադիրներից մեկս, կուսակցության շարքերը լքելու որոշում եմ կայացրել»:
Էրդողանը, ով այժմ զբաղված է ընտրարշավով և օրերս է վերադարձել երկրի արևելյան շրջաններ կատարած շրջագայությունից (այնտեղ է կենտրոնացած նրա հիմնական ընտրազանգվածը), դեռևս ոչ մի կերպ չի մեկնաբանել իր դաշնակցի հեռանալը:
Սակայն կուսակցության ղեկավարությունում Ֆըրաթի հեռանալու մասին լուրը տագնապով են ընդունել. Ֆըրաթն առաջինը չէ, ով հայտարարել է երկրի ղեկավարության հետ հարաբերությունների խզման մասին և հրաժարվել աջակցել Էրդողանին:
«Արդարություն և զարգացում» կուսակցությունում աղմկալի պաշտոնաթողությունների առաջին ալիքը տեղի է ունեցել դեռևս ձմռանը, երբ երկրում մասշտաբային սկանդալ հասունացավ, և վարչապետի գլխավորությամբ նախարարների կաբինետի մի քանի անդամների դեմ կոռուպցիոն մեղադրանքներ առաջադրվեցին: Մարտի վերջին Էրդողանի թիմին ժամանակավորապես համախմբեց կուսակցության հաջողությունը մունիցիպալ ընտրություններում, սակայն դրան հաջորդեցին նոր ցնցումներ. Մանիսա նահանգի ածխահանքում տեղի ունեցած ողբերգությունն ավելի քան 300 մարդու կյանք խլեց և ընդդիմադիր տրամադրությունների նոր բռնկման պատճառ դարձավ: Միևնույն ժամանակ Էրդողանը հակակոռուպցիոն քննություններով իրեն վիրավորողների դեմ արշավ անցկացրեց:
Այդ արշավի վերջին փուլը տեղի ունեցավ հուլիսի կեսերին: Թուրքիայի իշխանությունները հայտարարեցին սկզբում 67, այնուհետև ևս 22 ոստիկանների ձերբակալության մասին, ովքեր իբրև թե մասնակից են սկանդալային կոռուպցիոն գործով պաշտոնյաների մասին տեղեկությունների հավաքմանն ու հետաքննությանը: Առաջիկա ընտրություններում Էրդողանի գլխավոր մրցակից Էքմելեդին Իհսանօղլուն հայտարարել է, որ մի քանի տասնյակ ոստիկանների ձերբակալությունները «սև բիծ կթողնեն Թուրքիայի պատմության մեջ»: Ինչպես երևում է՝ այդպես է կարծում նաև իշխող կուսակցությունը լքած Դենգիր Ֆըրաթը:
