Արտառոց իրավիճակի են բախվել դատական պրիստավները Ռուսաստանի Նովոսիբիրսկի մարզում։ Նրանք կալանք են դրել մի տեղաբնակի ունեցվածքի, այսինքն՝ Օրլիկ ձիու վրա։ Բայց ձին թողել են տիրոջ պատասխանատու պահպանության ներքո։ Անսպասելիորեն ձին կորել է։ Ինչպես ցույց է տվել հետագա ստուգումը, տերը մորթել է Օրլիկին ու նրա միսն օգտագործել կերակրի մեջ, գրում է vesti.ru–ն։
Տղամարդու նկատմամբ հարուցվել է կատարողական դատավարություն նյութական վնասի փոխհատուցման մասին՝ հօգուտ Կարասուկի շրջանի ձեռնարկություններից մեկի։ Գանձման գումարը կազմել է 18 հազար ռուբլի։ Ձիու վրա կալանք դնելով՝ պրիստավը զգուշացրել է պարտապանին, որ նրա ձին այժմ գրանցված և կալանքի տակ դրված ունեցվածք է։ Եվ այդ ունեցվածքի նկատմամբ անօրինական գործողությունների համար քաղաքացիներին սպառնում է պատասխանատվություն ՌԴ Քր.օր-ի 312 հոդվածով։
Սակայն նախազգուշացումը չի վախեցրել պարտապանին, և նա պարզապես կերել է իր ձիուն։