«Առավոտ» օրաթերթը 20 տարեկան է: Այսօր թերթը նշում էր իր 20-ամյակը: Հրավիրատոմսեր ոչ մեկին չէին ուղարկել, հրավիրել էին նրանց, ովքեր իրենց համարում են «Առավոտի» բարեկամը, որովհետև, ինչպես իրենք են նշում, «Առավոտը» բոլորինն է:
Շնորհավորելու էին եկել քաղաքական և հասարակական գործիչներ, նախկին առավոտցիներ, լրագրողներ…
«Առավոտի» խմբագիր Արամ Աբրահամյանը «Առաջին լրատվական»-ի հետ զրույցում նշեց, որ նպատակը, խնդիրը ժամանակին և բազմակողմանի ինֆորմացիա տրամադրելն է, իսկ գերխնդիրը՝ մեր հասարակության մեջ ստեղծել հնարավորիս մեղմ, հանդուրժողական մթնոլորտ:
Արամ Աբրահամյանից հետաքրքրվեցինք՝ այս տարիների ընթացքում երբևէ անհարմարության զգացում ունեցե՞լ է, երբ իր լրագրողները դարձել են քաղաքական գործիչներ, պատգամավորներ, պաշտոնյաներ: «Եթե մարդն ասում է, որ թողնում է լրագրությունը և գնում է քաղաքականություն, դա նորմալ է: Ենթադրենք՝ նա պատշար էր, հետո դարձավ կոշիկ կարող, մասնագիտությունը փոխեց, և վերջ, ուրիշ բան է, որ նա պատշար է, բայց թաքուն կոշիկ է կարում: Ես սիրում եմ բոլոր նախկին առավոտցիներին, և նրանք էլ, ենթադրում եմ, որ ինձ են սիրում»,- ասաց Արամ Աբրահամյանը:
Նրա խոսքով՝ մամուլը, թերթերը այս 20 տարիների ընթացքում քիչ թե շատ ազատ էին, հեռուստատեսությունը՝ ոչ. ինչպես նախկինում, հիմա էլ ազատ չէ: «Կային առավել ազատ շրջաններ. դա Քոչարյանի նախագահության սկզբի տարին էր, մինչև հոկտեմբերի 27: Չկային զանգեր, անհանգստություններ, ոչ նորմալ հարաբերություններ այս կամ այն ճամբարի հետ և հիմա էլ չկա՝ սկսած 2011-ից»,- նշեց «Առավոտի» գլխավոր խմբագիրը:
Արդյոք դա պայմանավորված էր նրանո՞վ, որ ժամանակները փոխվեցին: Ի պատասխան՝ «Առավոտի» խմբագիրը նշեց, որ ժամանակաները փոխվեցին սոցցանցերի և կայքերի առկայության պարագայում:
ՀՀԿ-ական պատգամավոր, «Առավոտի» նախկին լրագրող Մարգարիտ Եսայանը «Առաջին լրատվական»-ի հետ զրույցում նշեց, որ «Առավոտը» մի տոն է, որը միշտ իր հետ է և բոլոր առավոտցիների: «Երջանկություն և մեծ պատիվ ունեմ, որ աշխատել եմ «Առավոտում», որ ճակատագիրն ինձ այդ հնարավորությունը տվել է»,- ասաց նա:
Մարգարիտ Եսայանը, սակայն, չի ափսոսում, որ փոխել է ոլորտը. «Ոչ մի ափսոսանք չկա, քանի որ ինչ-որ մի տարիքից հետո մարդը նոր փուլ պետք է ոտնակոխի: Ես ընդամենը այդ նոր փուլն եմ ոտնակոխել, բայց ես ինձ էլի համարում եմ առավոտցի, «Առավոտը» համարում եմ իմ հայրական օջախ, և միշտ էդպես է լինելու, քանի որ ես 20 տարի շարունակ և կյանքի հետ կապված ամեն ինչ եմ սովորել «Առավոտում»՝ և՛ լրագրության հետ կապված, և՛ ընդհանրապես որոշ սկզբունքներ և պատասխանատվություն ինձ «Առավոտն» է տվել: Ես դրա համար երջանիկ եմ»,- ասաց Մարգարիտ Եսայանը՝ հավելելով, որ Առավոտում աշխատելու տարիներին ուներ բացարձակ ազատություն, որն ինքը երբեք ի չարս չի գործադրել, ապա հավելեց, որ հիմա էլ ունի ազատություն, որը երբեք ի չարս չի գործադրելու:
Ավելին՝ տեսանյութում: