Բարերար և գործարար Լևոն Հայրապետյանի ձերբակալության գործով հրավիրված մամլո ասուլիսի ժամանակ ԼՂՀ «Մարտական խաչ» 1-ին աստիճանի շքանշանի ասպետ, ԱԱԾ պաշտոնաթող գնդապետ Արթուր Ալեքսանյանը հայտարարեց, որ իր տեղեկություններով՝ ԼՂ նախագահ Բակո Սահակյանը զբաղված է Լևոն Հայրապետյանի ձերբակալության գործով: Նա նման հայտարարություն արեց՝ ի պատասխան այն հարցի, թե ինչո՞ւ են ՀՀ իշխանությունները լուռ այս հարցում:
Նա ևս կարծում է, որ կատարվածը Ադրբեջանի ԱԱԾ-ի և ՌԴ կաշառված իրավապահների ձեռքի գործն է. «Ուղղակի ինձ անհանգստացնում է, թե ինչպես նա կարող է այդ առողջական վիճակով դիմանալ. մենք բոլորս պետք է պայքարենք նրա համար: Ինչո՞ւ չեն ազատում նրան գրավի դիմաց: Մենք կարող ենք հավաքել՝ քանի միլիոն պետք է, ինքն էլ ունի, բայց չեն վերցնում այդ փողը, չեն հանում գրավի դիմաց»:
Ասուլիսի բանախոսներից՝ Արցախի հերոս Արկադի Տեր-Թադևոսյանի կարծիքով՝ եթե իշխանությունները որևէ քայլ ձեռնարկեն այդ ուղղությամբ, ապա պարտադիր չէ, որ դա բացահայտ անեն: «Նման բաները գաղտնի են արվում»,- ասաց նա: