Թուրքական «Sabah» թերթի հաղորդմամբ, Հունաստանում գտնվող Թուրքիայի արտգործնախարար Ահմեդ Դավութօղլուն անդրադարձ է կատարել թուրք-հունական հարաբերություններին. «Մենք չենք կարծում, թե Հունաստանը սպառնում է մեր անվտանգությանը: Միևնույն ժամանակ, մենք նմանատիպ վստահություն ենք ակնկալում Հունաստանից: Երկու երկրները պետք է կառուցողական երկխոսություն սկսեն` խուսափելով բանավեճերից ու կոնֆլիկտներից: Անհրաժեշտ է փոխել թուրք-հունական հարաբերությունների ստատուս-քվոն»:
Հիշեցնենք, որ երկու երկրների միջև, Կիպրոսի խնդրից բացի, առկա են նաև Էգեյան ծովին առնչվող համալիր խնդիրներ (Էգեյան ծովի հունական կղզիներ, հունական տարածքային ջրեր ու դրանց օդային սահման, Էգեյան ծովի մայրցամաքային շելֆի բաժանում):
Ի դեպ, միայն 2000-2009 թվականներին թուրքական օդուժը 49.228 անգամ խախտել է հունական օդային տարածքը: Միևնույն ժամանակահատվածում Հունաստանի ռազմաօդային ուժերն իրականացրել են 19,888 կանխարգելիչ թռիչք` դրանց վրա ծախսելով 447.5 միլիոն եվրո:
