Թուրքական «Radikal» թերթի փոխանցմամբ, Քրդստանի աշխատավորական կուսակցության (PKK) ազդեցիկ առաջնորդներից Մուրաթ Քարայըլանը հանդես է եկել իշխող Արդարություն ու զարգացում կուսակցությանը (ԱԶԿ) հասցեագրած սպառնալիքներով. «Եթե ԱԶԿ-ն շարունակի ձերբակալել քուրդ քաղաքական գործիչներին, ապա մենք էլ կսկսենք վարվել նմանատիպ կերպ և կձերբակալենք ԱԶԿ անդամներին»:
Հիշեցնենք, որ ներկայումս Դիարբեքիրի դատարանում ընթանում է Թուրքիայում արգելված PKK-ին աջակցելու մեղադրանքով հարուցված ամենազանգվածային դատական գործընթացը, որում հայտնվել է PKK քաղաքական կառույց հանդիսացող «Քուրդիստանի հասարակությունների միության» (KCK) 151 ներկայացուցիչ:
Իսկ նախորդ աշնանը քրդական «Firat» լրատվական գործակալության հաղորդած տվյալներով, խորհրդարան մուտք գործելու օրվանից սկսած (2007, Դեմոկրատական հասարակարգ կուսակցություն անվանմամբ) քրդական միակ լեգալ Խաղաղություն և ժողովրդավարություն (ԽԺԿ) կուսակցության ներկայացուցիչների դեմ բացվել է 554 քրեական գործ, որոնցում պահանջվում է ընդհանուր առմամբ 2,473 տարվա բանտարկություն: