Մարզակոշիկներ և մարզահագուստ արտադրող գերմանական Puma ընկերությունը մտադիր է մոտ ժամանակներս հրաժարվել հայտնի մարդկանց հետ մի շարք թանկարժեք հովանավորչական գործարքներից և կրճատել արտադրական ծավալները: Այս մասին հաղորդում է Reuters գործակալությունը և նշում, որ այդ կերպ ընկերությունը փորձում է փոխհատուցել կորուստները՝ կապված Եվրոպայում վաճառքի ծավալների անկման հետ:
Ամենահայտնի մարզիկը, որը գովազդում է Puma-ի արտադրանքը, ջամայկացի վազորդ Ուսեյն Բոլտն է: Օլիմպիական եռակի չեմպիոն և համաշխարհային ռեկորդակիր Բոլտի հետ պայմանագրի ժամկետն ավարտվում է 2013-ի վերջին: 2010-ին Puma-ն հայտարարել էր, որ դա ընկերության ամենաթանկարժեք պայմանագիրն է մարզիկների հետ: Դեռևս հայտնի չէ, ընկերությունը կվերանայի՞ պայմանագրի պայմանները, թե՞ ոչ:
Այսօր Puma-ն հայտարարել է, որ իր արտադրանքի վաճառքը Եվրոպայում, Մերձավոր Արևելքում և Աֆրիկայում շարունակում է կրճատվել: Ըստ այդմ՝ Ամերիկայում և Ասիայում Puma-ի բիզնեսը 2012-ի առաջին վեց ամիսներին աճել է 17-18 տոկոսով:
Մարզահագուստ արտադրող ընկերությունների շարքում վաճառքի ծավալով Puma-ն զբաղեցնում է 3-րդ տեղը՝ Nike-ից և Adidas-ից հետո: Nike-ի կապիտալիզացիան ԱՄՆ-ում գնահատվում է 35 միլիարդ դոլար, Գերմանիայի բորսայում Adidas-ը՝ 12 միլիարդ եվրո, իսկ Puma-ն՝ կրկին Գերմանիայի բորսայում՝ 3,3 միլիարդ եվրո:
