Վանաձորում այս տարվա 6 ամիսներին գրանցվել է աղիքային վարակների 281 դեպք:
Ընթացիկ տարվա 6 ամիսներին, նախորդ տարվա նույն ժամանակահատվածի համեմատ, Վանաձորում նվազել են թե՛ աղիքային, թե՛ օդակաթիլային ճանապարհով փոխանցվող վարակները:
«Առաջին լրատվական»-ի հետ զրույցում Հիգիենիկ հակահամաճարակային տեսչության Լոռու մարզային կենտրոնի տնօրեն Կարինե Միրզոյանը նշեց, որ 2012թ.-ի 6 ամիսներին Վանաձորում գրանցվել է աղիքային վարակների 281 դեպք՝ նախորդ տարվա նույն ժամանակահատվածի 289-ի փոխարեն:
Նրա փոխանցմամբ՝ տարվա այս ժամանակահատվածում դեպքերի աճ միշտ էլ նկատվում է, ինչը պայմանավորված է միրգ-բանջարեղենի՝ արևի տակ կատարվող վաճառքով և շոգ եղանակով:
Անդրադառնալով վերջին շրջանում Վանաձորում հաճախակի դարձած սնկային թունավորումներին՝ մարզի գլխավոր համաճարակաբանը բնակչությանը մեկ անգամ ևս կոչ արեց հեռու մնալ տարատեսակ սնկեր օգտագործելուց, եթե համոզված չեն դրանց անվտանգ լինելու մեջ:
«Միայն այս ամիս Վանաձորում գրանցվել է սնկային թունավորման 3 դեպք`տուժել է 5 մարդ»,- ասաց նա՝ նկատելով, որ բոլոր դեպքերում բնակիչները իրենք են հավաքել դրանք և իրենց ձեռքով պատրաստել:
Շուշաննա Գրիգորյան
Լոռու մարզ
