Ռուսաստանի քրեական աշխարհի պատրիարք Վյաչեսլավ Իվանկովի` Յապոնչիկի սպանության գործի քննության մեջ նոր շրջադարձ է եղել: Քրեական գործը, որը կասեցված էր, կարող է վերսկսվել. Տյումենի գաղութից Մոսկվա են տեղափոխել Յապոնչիկի ոխերիմ թշնամիներից մեկին` օրենքով գող Իլյա Սիմոնիային: Մախո մականվամբ վրացի հեղինակությանը մտադիր են հարցաքննել Մոսկվայի քննիչները: Բացի այդ, նախատեսվում է օրենքով գողից գենետիկական փորձաքննության համար վերցնել քրտնքի և թքի նմուշներ: Այդ մասին հայտնում է Известия թերթը:
Յապոնչիկի սպանությունից հետո քրեական աշխարհում հենց սկզբից էր Իլյա Սիմոնիան հայտնվել կասկածյալների շարքում, հենց առաջին օրերին, երբ 2009-ի հուլիսի 28-ին քիլլերը դիպուկահարի հրազենից փամփուշտ էր արձակել Իվանկովի որովայնին` «Տայսկի սլոն» ռեստորանից դուրս գալու ժամանակ: Բանն այն է, որ Մախոյի և Յապոնչիկի միջև դեռևս 80-ականներին վեճ էր ծագել Իրկուտսկի մարզում գտնվող Տուլունի գաղութում: Այդ վեճը հետո վերածվել էր հակամարտության` Յապոնչիկի, Ասլան Ուսոյանի (Դեդ Հասան) և վրացի գող Տարիել Օնիանիի (Տարո) կողմնակիցների միջև:
2010-ին` ձերբակալելուց հետո, Մախոյին հարցաքննել էին Յապոնչիկի սպանության գործով, սակայն ոչնչի չէին հասել. գողական ավանդույթների համաձայն` քննչական մարմինների հետ համագործակցությունը անպատվաբեր է: Փորձել էին նաև նրանից վերցնել քրտնքի և թքի նմուշներ, որոնք պետք է համեմատեին հանցագործության վայրից վերցված նույնատիպ նմուշների հետ, սակայն Մախոն հրաժարվել էր:
Քրեական աշխարհը, որն ավելի շատ իրազեկողներ ունի, քան օպերատիվ աշխատողները, միանգամից կասկածի տակ էր առել Տարոյին: Իվանկովի սպանությունից անմիջապես հետո գողական «սխոդկայի» ժամանակ Օնիանիի նկատմամբ մահապատժի դատավճիռ էր կայացվել: Քանի որ այն ժամանակ Տարոն գտնվում էր «Մատրոսկայա տիշինա» ՔԿՀ-ում, այնտեղ, այսպես ասած, քսիվ էր ուղարկվել: Տեքստում ասվում էր. «Գողերին` կյանք: Խաղաղություն և բարգավաճում մեր Մեծ տանը և Գողական գործերին. կալանավորներ, ձեզ տեղյակ ենք պահում, որ ՄՏ (Մատրոսկայա տիշինա) է եկել Տարիել Օնիանին, ով գողերի կողմից հայտարարվել է բ…: Նրա հետ հանդիպելու դեպքում` վարվել համապատասխանաբար»: Այս «շրջաբերականն» ընկել էր բանտի վարչակազմի ձեռքը, սակայն նրա բովանդակությունը հայտնի էր դարձել բոլոր հետաքրքրված անձանց: Դրանից մոտ մեկ տարի անց քիլլերը Տվերսկի փողոցի վրա հրազենից կրակ էր արձակել նաև Ասլան Ուսոյանի վրա և վիրավորել, սակայն օրենքով գողին հաջողվել էր ողջ մնալ:
Այժմ քննիչները նախատեսում են կրկին հարցաքննել Իլյա Սիմոնիային` Իվանկովի սպանության գործի շրջանակներում: Թերթի աղբյուրներից մեկի համաձայն` պատրաստվում են նրան մեղադրանք առաջադրել, սակայն մեկ այլ զրուցակից հավաստիացրել է, որ Մախոն առայժմ կհարցաքննվի վկայի կարգավիճակով, որը մոտ ապագայում դժվար թե փոխվի:
Քննիչները Սիմոնիային կասկածելու մի քանի հիմնավորումներ ունեն. Նախ` նա դրդապատճառ ուներ. հենց Իվանկովն էր եղել Մախոյին օրենքով գողի «թագից» զրկելու նախաձեռնողը: Երկրորդ` Սիմոնիան նախկինում դատապարտված է եղել պատվիրված սպանության համար: Եվ վերջապես երրորդ` Սիմոնիան 2010-ի սեպտեմբերին ձերբակալվել էր Մոսկվայի հենց նույն հյուսիսային շրջանում, որտեղ տեղի էր ունեցել Իվանկովի նկատմամբ հարձակումը:
Թարգմանությունը` Էլմիրա Մարտիրոսյանի
