Lenta.ru-ի փոխանցմամբ՝ Իրանի գերագույն ղեկավար ու հոգևոր առաջնորդ, այաթոլլահ Ալի Խամենեին կրոնական ուսումնական հաստատություններից մեկում հայտարարել է Դատաստանի օրվա մոտեցման մասին.
«Մարդկությունն ընդհանրապես և Իրանի ժողովուրդը մասնավորապես պետք է պատրաստ լինեն 12-րդ իմամի (Մահդի) գալստյանը, պատմության ընթացքում վերջին պատերազմին և Դատաստանի օրվան: Մենք պարտավոր ենք նախապատրաստվել դրան:
Եվ քանի որ մենք մեզ համարում ենք 12-րդ իմամի զինվորները, ապա մենք պետք է պատրաստ լինենք նաև մարտնչելուն: Բարձրյալի ղեկավարությամբ և նրա անտեսանելի օգնությամբ մենք կվերադարձնենք իսլամական քաղաքակրթության հպարտությունը: Դա մեր ճակատագիրն է:
Մենք պետք է պատրաստ լինենք այդ մեծ առաքելության իրագործմանը: Խոսքն աշխարհի վերջի մասին է: Կգա ժամանակը, և աշխարհի բոլոր կեղեքողները կոչնչացվեն, ու մարդկությունը կթևակոխի իմամ Մահդիի ժամանակաշրջան»:
Հիշեցնենք, որ շիիզմում Մահդին 12–րդ «թաքնված» իմամն է՝ Մուհամեդի վերջին ժառանգը, ով անհետացել է 941 թվականին և գալու է Ահեղ դատաստանի օրերին աշխարհը փրկելու և նոր, իսլամական կարգ հաստատելու համար: Դեռևս իսլամի վաղ շրջանում Մահդին ընդունվել է որպես սպասված ղեկավար, որը պետք է վերականգնի իսլամի սկզբնական մաքրությունը:
