Եգիպտոսը կառավարող Զինված ուժերի գերագույն խորհուրդն այսօր պաշտոնապես ազատ է արձակել Ազգային ժողովը: Ինչպես հաղորդում է տեղական մամուլը, զինվորական հրամանատարության համապատասխան որոշումն ուղարկվել է խորհրդարանի ստորին պալատի գլխավոր քարտուղարություն:
Հինգշաբթի օրը Եգիպտոսի Սահմանադրական դատարանն Ազգային ժողովի կազմը ոչ լեգիտիմ է ճանաչել։ Այստեղ տեղերի մեծ մասը զբաղեցրել էին իսլամիստները: Դատարանի վճռում նշվում է, որ «խորհրդարանական ընտրությունների մասին օրենքը խախտվել է, ընտրություններն անցել են սահմանադրական նորմերի խախտմամբ, և պատգամավորների կազմն ապօրինի է»։ Այս մասին գրում է Itar-Tass-ը:
Բացի այդ, ինչպես այսօր հաղորդել է եգիպտական մամուլը, նախագահական ընտրությունների երկրորդ փուլից հետո Գերագույն խորհուրդը կհայտարարի Սահմանադրության հռչակագրի լրացումների մասին, որը կորոշի Եգիպտոսի քաղաքական կյանքն անցումային շրջանում: Այն հաստատվել էր 2011 թվականի մարտին կայացած հանրաքվեի արդյունքոմ: Այժմ բանակը մտադիր է մի շարք լրացումներ անել, որոնք կորոշեն նախագահի լիազորությունները, նոր Սահմանադրական խորհրդի ձևավորման սկզբունքը, որը կզբաղվի երկրի նոր հիմնական օրենքի մշակմամբ:
