1993թ. այս օրը Աղդամին հարակից Մարզիլի գյուղի մոտ զոհվեցին ԱՍԱԼԱ-ի նախկին անդամ, ՀՀ ազգային հերոս, ուրարտագետ, Հայ դատի և արցախյան ազատամարտի նվիրյալ Մոնթեն և նրա զինակից Սարիբեկը:
Ծնվել է 1957թ. նոյեմբերի 25-ին ԱՄՆ-ի Վայսելիա քաղաքում հանգրվանած հայի ընտանիքում: Հնագիտության պրոֆեսոր էր և տիրապետւմ էր 8 լեզվի: Իր ողջ գիտակից կյանքում պայքարել է հայերի իրավունքների, հայոց ցեղասպանության ճանաչման համար: 1980թ. անդամագրվելով Հայաստանի ազատագրության հայ գաղտնի բանակին՝ կարճ ժամանակում դարձել է նրա ղեկավարներից մեկը:
1981թ. նրա մասնակցությամբ կազմակերպվել է հայտնի «Վան» գործողությունը, որը ԱՍԱԼԱ-ին հասցրեց իր պատմության գագաթնակետին: 1981թ. նոյեմբերի 11-ին Ֆրանսիայի «Օռլի» օդանավակայանում Մոնթեն ձերբակալվել է կեղծ անձնագիր և ատրճանակ կրելու մեղադրանքով, դատապարտվել նախ` 4 ամսվա ազատազրկման, իսկ ավելի ուշ դատարանը որոշել է վտարել նրան Ֆրանսիայից:
Մոնթեն բանտից դուրս է եկել 1989թ. հունվարի 16-ին և մի քանի տարի տարբեր երկրներում դեգերելուց հետո եկել Հայաստան,որտեղ արդեն սկսվել էր Արցախյան ազատագրական պայքարը: Ընդունելով Ավո կեղծանունը` 1991թ. սեպտեմբերին մեկնեց Արցախ:
1992թ. Վազգեն Սարգսյանի առաջարկով ստանձնել է Մարտունու շրջանի շտաբի պետի պարտականությունը: Այստեղ կարճ ժամանակում նա շահել բնակչության սերն ու հարգանքը,իր անկեղծությամբ ու մաքրությամբ: Նրա ղեկավարությամբ Մարտունին դարձել է ամենապաշտպանված ու ամենամարտունակ շրջանը: 1993թ. մարտ-ապրիլ ամիսներին նրա ղեկավարությամբ ազատագրվել է նաև Քարվաճառը:
1993թ. հունիսի 12-ին Մոնթեն և իր ընկերները Մարզիլի գյուղի մոտ հանդիպում են զրահամեքենայի: Կարծելով հայեր են՝ մոտենում են,սակայն պարզվում է` ազերիներ են: Սկսվում է փոխհրաձգություն, որի ժամանակ սպանվում են Մոնթեն և ընկերը՝ Սարիբեկը:
Հետմահու Մոնթեն արժանացել է Ազգային հերոսի կոչման: