Երևանում հանրահավաքի ժամանակ տեղի ունեցած փուչիկների պայթյունի հետևանքով ռուսներ չեն տուժել: Այս մասին այսօր` մայիսի 5-ին, RIA Novosti գործակալության հետ զրույցում ասել է Հայաստանում ՌԴ դեսպանատան մամլո կցորդ Սերգեյ Աբելյանը:
«Տուժածների թվում Ռուսաստանի քաղաքացիներ չկան»,- ասել է դիվանագետը:
Ինչպես գրում է գործակալությունը, իշխող Հանրապետական կուսակցության նախընտրական քարոզչության ժամանակ՝ մայիսի 4-ին, Երևանի Հանրապետության հրապարակում պայթել են գազով լցված փուչիկները: Տուժել են բեմի անմիջական հարևանությամբ գտնվող մարդիկ: ԱԻ նախարարության տվյալներով` 154 մարդ, այդ թվում` երեխաներ, ստացել են այրվածքներ ու հոսպիտալացվել են: Ներկայում հիվանդանոցներում գտնվում է 76 մարդ:
Հայաստանի ոստիկանությունը դիտարկում է կատարվածի մի քանի վարկած` «ինքնաբռնկում, հրդեհային անվտանգության կանոնների խախտում, դյուրավառ նյութերի պահպանման կանոնների խախտում, առողջությանը հասցված վնաս կանխամտածված կամ պատահական կերպով»:
