Սեռավարակների թիվը տարեցտարի ավելանում է ոչ միայն Հայաստանում, այլև՝ ամբողջ աշխարհում: Հոնորեայով տարեկան վարակվում է շուրջ 200 միլիոն մարդ, քլամիդիոզով` 200-250 միլիոն, տրիխոմոնիազով` 100 միլիոն, միկոպլազմոզով` 100 միլիոն, սիֆիլիսով` 50 միլիոն և այլն: Ըստ այս տվյալների՝ տարեկան մոտ 850 միլիոն մարդ վարակվում է սեռավարակներով՝ սեռական ճանապարհով փոխանցվող որևէ վարակով (ՍՃՓՎ): Ըստ վիճակագրական տվյալների՝ վարակվածների գրեթե 80 %-ը մինչև 30 տարեկան է:
Ըստ մաշկավեներոլոգ Գարրի Հարությունյանի՝ կան սեռական հիվանդություններ, որոնց թիվը նվազել է. «Օրինակ՝ հոնորեայով և սիֆիլիսով հիվանդների թիվը քչացել է»: Ըստ բժշկի՝ հիվանդությունների աճի պատճառն այն է, որ սեռական հարաբերություններ ունենալն այսօր ավելի ազատ հարց է դարձել. «Եթե նախկինում աղջիկները մտածում էին «կարմիր խնձորի» և ամուսնության մասին, ապա այսօր նման բաները կարևոր չեն: Կարող են նաև չամուսնանալ, բայց ունենալ սեռական հարաբերություն: Հետևաբար դա նպաստում է սեռական հիվանդությամբ վարակվելուն»: Բժշկի խոսքերով՝ ռիսկային գործոն է համարվում նաև «խոպանը», սակայն դա ավելի շատ տարածված էր սովետական տարիներին:
Գ. Նահապետյանը նշեց, որ սեռական հիվանդությունների մեծ մասը թաքնված է, այսինքն՝ կինը երկար ժամանակ կարող է չիմանալ, որ նման հիվանդություն ունի, այդ իսկ պատճառով գոնե 3 ամիսը մեկ պետք է այցելել բժշկի. «Երբ կանանց հարցնում ես՝ վերջին անգամ ե՞րբ ես գնացել բժշկի, պատասխանում է, թե ի՞նչ խնդիր կա, որ գնամ: Պարզապես նրանք պետք է հասկանան, անկախ նրանից ունեն խնդիր, թե՝ ոչ, հարկավոր է պարբերաբար ստուգվել։ Զարմանալի է, բայց ամուսնանալուց մեկ–երկու ամիս առաջ անպայման գալիս են ստուգվելու»:
Մասնագետի կարծիքով՝ սեռավարակները հիմնականում տարածված են տղամարդկանց մոտ, իսկ սեռական հիվանդություններ ունեն հիմնականում այն կանայք, ովքեր մի քանի հոգու հետ են ունենում սեռական հարաբերություններ:
«Միշտ չէ, որ հիվանդությունը փոխանցվում է սեռական ճանապարհով: Հնարավոր է նաև, որ այն ծննդաբերության ժամանակ փոխանցվի մորից երեխային կամ էլ կարող է լինել այնպես, որ երեխան մոր ներքնաշորը հագնի և վարակվի: Ւմ պրակտիկայում ես հանդիպել եմ նման դեպքերի: Սակայն խոցելի խումբ են համարվում 18-30 տարեկան մարդիկ»,– ասաց բժիշկը:
