Քաղաքական և ընտրական տեխնոլոգիաների փորձագետ Արմեն Բադալյանի համոզմամբ՝ ԲՀԿ առաջնորդ Գագիկ Ծառուկյանի այն հայտարարությունը, որ ինքը պատրաստ է կորցնել ամեն ինչ, բայց սրբությամբ պահպանել ժողովրդի, հանրության հավատը, նախընտրական քարոզարշավի բաղկացուցիչ տարրերից է, և այդ խոսքերի տակ առավել լուրջ ենթատեքստ ու ինտրիգներ չպետք է փնտրել: Այս մասին նա ասաց «Առաջին լրատվական»-ի հետ զրույցում:
«Բոլոր կուսակցությունների ղեկավարներն էլ նախընտրական քարոզարշավի ժամանակ նման հուզական ելույթներ են ունենում: Արտերկրում էլ, կուսակցությունների ղեկավարներն ասում են, որ պատրաստ են մեռնել հանուն գաղափարների, բայց դրան, իհարկե, չպետք է հավատալ: ԲՀԿ կարգախոսն էլ «Հավատա, վստահիր, պահանջիր» է, այնպես որ՝ քաղաքական այդ ուժի առաջնորդը մարդկանց հավատի վրա է աշխատում»,- ասաց Արմեն Բադալյանը:
Քաղաքական և ընտրական տեխնոլոգիաների փորձագետը նաև նշեց, որ չի կարծում՝ Գագիկ Ծառուկյանի այսօրինակ հայտարարությունը նրա և ՀՀ երկրորդ նախագահ Ռոբերտ Քոչարյանի միջև առկա ինչ-ինչ խմորումների արդյունք լինի:
Նշենք, որ նախընտրական քարոզարշավի առաջին օրը հանդիպում ունենալով աբովյանցի ընտրողների հետ՝ «Բարգավաճ Հայաստան» կուսակցության նախագահ Գագիկ Ծառուկյանը իր 15 րոպեանոց ելույթում հայտարարել էր. «Այսօր ինձ համար ծանր է, դժվար է: Ես պատրաստ եմ կորցնել ամեն ինչ, բայց ժողովրդի, հանրության հավատը սրբությամբ պահպանել: Ես երբեք ու երբեք այդ հավատը չեմ կորցնելու»:
