Քաղաքական ու միջազգային հետազոտությունների հայկական կենտրոնի՝ այսօր կազմակերպած քաղաքական քննարկման ժամանակ ԲՀԿ պատգամավոր Արամ Սաֆարյանն իր կուսակցության նախընտրական ցուցակը գնահատեց որպես մրցունակ:
«Մեր ցուցակում ընդգրկված են հեղինակավոր տնտեսագետներ, իրավաբաններ, քաղաքական նշանավոր գործիչներ: ԲՀԿ ցուցակի 20-յակի 30 տոկոսը երիտասարդներ են, որոնք մինչ այժմ աչքի են ընկել իրենց գործերով։ Ցուցակի մնացած մասի 90 տոկոսը մարդիկ են, ովքեր մեզ հետ անցել են հինգ տարվա փորձաշրջան, գործել են անդավաճան:
Մեր նախընտրական պլատֆորմի ծրագիրը մշակվել է ամիսներ շարունակ և հավանության արժանացել կուսակցության առաջնորդ Գագիկ Ծառուկյանի կողմից: ԲՀԿ-ն կենտրոնական ուժ է, որը գործում է ազգային միասնության դիրքերից։ Միայն երկխոսության պայմաններում է հնարավոր լուծել ավելի լավ Հայաստան կառուցելու խնդիրը: Այդ է պատճառը, որ ԲՀԿ-ն երբեք մասնակից չի եղել ինտրիգների, եղել է շիտակ դիրքորոշումների կողմնակից»,- ասաց նա։
Արամ Սաֆարյանի խոսքով՝ ԲՀԿ-ն հանդես է գալիս ազատ, արդար ընտրությունների անցկացման օգտին, որոնք կարող են լուծել երկրի առջև ծառացած խնդիրները:
