Թուրքական Yeni Şafak թերթի փոխանցմամբ՝ Թուրքիայի վարչապետ Ռեջեփ Էրդողանը Սեուլում տեղի ունեցած միջուկային անվտանգության գագաթնաժողովից հետո մեկնել է Ղազախստանի նախկին մայրաքաղաք Ալմա Աթա, ուր և լրագրողների հետ զրույցում անդրադարձել է Սիրիայի նախագահ Բաշար Ասադի՝ Քոֆի Անանի ծրագիրն ընդունելու խոստումներին:
«Թուրքիան չի հավատում Ասադի այն խոսքերին, թե իբր նա ընդունել է Անանի ծրագիրը: Ասադը նախկինում էլ բազմիցս խոստումներ է տվել ինձ, նախագահ Աբդուլլահ Գյուլին ու արտգործնախարար Ահմեդ Դավութօղլուին, սակայն դրանցից և ոչ մեկը չի կատարել: Մենք այլևս չենք հավատում նրա խոստումներին: Չնայած դրան՝ մենք հուսով ենք, որ Անանի ծրագիրը կաշխատի և կդադարեցվի ավելի քան մեկ տարի Սիրիայում շարունակվող արյունահեղությունը»,- ասել է Թուրքիայի վարչապետը:
Դավութօղլուն, իր հերթին, նկատի ունենալով առաջիկայում Ստամբուլում կայանալիք «Սիրիայի բարեկամներ»-ի խմբի երկրորդ հանդիպումը՝ հայտարարել է, որ յուրաքանչյուր ճգնաժամային կոնֆերանսից առաջ Ասադը նմանատիպ խոստումներ է տալիս:
