«Շիրակ կենտրոն»-ը անօթևան ընտանիքներին և ծնողազուրկ երեխաներին օգնություն ցուցաբերելու «Միասին կարող ենք» խորագիրը կրող նախաձեռնությանը զորավիգ կանգնած, ամերիկացի բարերար Էլբիստ Մադաթյանի միջոցներով Թոսունյանների բազմանդամ ընտանիքին տրամադրել է սնունդ և գրենական պիտույքներ: Իսկ հագուստ կտրամադրեն առաջիկայում:
Գյումրու Դեմիրճյան փողոցի նեղլիկ նրբանցքներից մեկում գտնվող Թոսունյանների բազմանդամ ընտանիքի կացարանը գտնելու համար նրանցից ժամեր է պահանջվել: Երկար փնտրտուքից հետո նրանք որոշել են այդ թաղի աղքատիկ խանութի վաճառողուհու օգնությանը դիմել:
Նրանց ընտանիքին անմիջապես ճանաչեց վաճառողուհին: «Այս ընտանիքը թեև թաղի ամենաղքատ ընտանիքն է, սակայն հացի պարտքերը մուծելիս շատ պարտաճանաչ են, հենց նպաստը ստանում են, սոված էլ մնան, բերում փակում են պարտքը».-նրանց տան տեղը ցուցադրելով՝ ասաց վաճառողուհին:
Երբ մտանք Թոսունյանների բակը, առաջին հայացքից այն տպավորությունը ստացանք, որ այն լքված բնակատեղի է, շուրջ բոլորը քարուքանդ կառույցներ էին: Այնուամենայնիվ, մի փոքրիկ կառույց կար, որի պատուհանից դուրս եկած խողովակից ծուխ էր դուրս գալիս: Դուռը թակելու կարիք չկար, այն բացեր էր, սենյակի ողջ հատակին էլ տարաբնույթ տարաններ էին շարված, որոնք լիքն էին կաթոցներից առաջացած ջրից:
Թոսունյաններն անօթևանի կարգավիճակ չունեն, բնակվում են համայնքային սեփականություն համարվող «ֆոնդի» կոչվող փոքրիկ կացարանում: Թոսունյան ամուսինները 7 երեխա ունեն: Փոքրը 8 տարեկան է, մեծը՝ 21: Նրանց ապրուստի հիմնական միջոցը սոցապահովման նպաստն է: Մի քանի ամիս առաջ երեխաներից ավագները` 21-ամյա Զարզանդը և 20-ամյա Արմանը մեկնել են Ռուսաստան՝ արտագնա աշխատանքի:
Ավագ քույրերը Գյումրու Կուսաստան Հայաստան մանկատան սաներ են, իսկ ավագը մինչև Հայոց բանակում ծառայելը մի տարի ուսանել է Եվրոպական համալսարանում, սակայն բանակից հետո վարձավճարը մուծել չկարողանալու պատճառով նրան հեռացրել են համալսարանից: 7 երեխաներից 4-ը դպրոցական են, իսկ 17-ամյա Արզումանը զբաղվում է բռցնքամարտով, թեև երկրորդ ամիսն է, ինչ մարզահագուստ չունենալու պատճառով չի հաճախում պարապմունքներին:
Ընտանիքի մոր խոսքերով, իրենց բազմանդամ ընտանիքը որևէ աջակցության կամ ուշադրության չի արժանացել ինչպես բարեգործական կազմակերպությունների, այնպես էլ իշխանությունների կողմից:
Այն հարցին, թե ինչի կարիք ունի ընտանիքը բացի բնակարանից, մայրը պատասխանեց, թե սննդի և հագուստի:
