ՀՀԿ-ն քաջ գիտակցում է, որ հաջորդ տարի կայանալիք նախագահական ընտրությունների ֆոնին առաջիկա խորհրդարանական ընտրությունների բարեհաջող անցկացումը խիստ կարևոր է. այսօր կայացած մամուլի ասուլիսում ասաց ՀՀԿ-ական պատգամավոր Հովհաննես Սահակյանը:
«ՀՀԿ ցուցակը բավական լայն է և ընդգրկուն: Այն բավական թարմ է, և ի տարբերություն շատ այլ քաղաքական ուժերի ցուցակների` դրանում ներգրավված են բավական թվով նոր մարդիկ: Բացի այդ, ուզում եմ շեշտել, որ մեր ցուցակը բավական լուրջ քննարկումների արդյունք է: ՀՀԿ նորեկների հետ կապված էլ մեկ բառով կասեմ՝ ոչ, հնաբնակ հանրապետականների մոտ ցուցակում նրանց ընդգրկվածության առումով դժգոհություններ չկան:
Կապված ցուցակում իմ տեղի հետ` հայտարարում եմ, որ որևէ բարդույթ չունեմ: Ես այսուհետ էլ շարունակելու եմ մեր նախագահի կողքին կանգնած մնալ»,- ասաց նա:
Սահակյանի խոսքով՝ ՀՀԿ ընտրազանգվածը կայուն է, և ակնհայտ է, որ ընտրությունների իրական պայքար ծավալվելու է այն քաղաքական ուժերի միջև, որոնք համեմատաբար մեծ ընտրազանգված ունեն: «Այս տեսակետից չեմ թերագնահատում ոչ «Ժառանգությանը», ոչ էլ ՕԵԿ-ին»,- ասաց նա:
Անդրադառնալով մեծամասնական առաջադրումների թեմային` պատգամավորը նշեց, որ ՀՀԿ-ն առաջադրումներ արել է այնտեղ, որտեղ վստահ է եղել իր թեկնածուների հաղթանակի վրա:
«Լրատվամիջոցներից տեղեկացա, որ «Ժառանգություն» կուսակցության նախագահ Րաֆֆի Հովհաննիսյանը թիվ 7 ընտրատարածքից ինքնաբացարկ է հայտարարել: Սա, իմ կարծիքով, նշանակում է, որ ընդդիմությունը պատրաստվում է քաղաքակիրթ պայքարի»,- նշեց Սահակյանը:
