Սիրիայի կառավարության դեմ մարտնչող, այսպես կոչված, Սիրիական ազատ բանակի ղեկավար, ռազմաօդային ուժերի նախկին գնդապետ Ռիադ Ասադը շաբաթ օրը հայտարարել է Ռազմական խորհրդի ստեղծման մասին: Այս մասին հաղորդել է France Presse գործակալությունը:
Ըստ նախկին գեներալի՝ խորհրդի ստեղծումը նպատակ ունի միավորել Բաշար Ալ-Ասադի հակառակորդների ուժերը: Ռիադ Ասադը կոչ է արել ընդդիմադիր ուժերին զենքը ձեռքներին միանալ խորհրդին:
«Այսօր Թուրքիայում պայմանագիր է կնքվել: Դրանում պաշտոնապես հրապարակվել է, որ Բարձրագույն հեղափոխական խորհուրդը միավորվելու է Սիրիական ազատ բանակի հետ»,- ասվում է հաղորդագրության մեջ:
Ռազմական խորհրդի ղեկավար է լինելու Աշ-Շեյխը:
Սիրիական ազատ բանակը կազմավորվել է անցյալ տարվա աշնանը, և այժմ այն գտնվում է Ռիադ Ասադի հրամանատարության ներքո: Արաբական ԶԼՄ-ների տեղեկատվության համաձայն՝ բանակում, բացի սիրիացի զինծառայող դասալիքներից, ծառայում են նաև տարբեր արաբական երկրների, այդ թվում՝ նաև Լիբիայի սունի կամավորներ:
