Մինսկի մետրոյի ահաբեկչության մեջ մեղադրվող Վլադիսլավ Կովալյովի մայրը՝ Լյուբով Կովալյովան դիմել է Բելառուսի նախագահ Ալեքսանդր Լուկաշենկոյին՝ խնդրելով իրեն փոխանցել մահապատժի ենթարկված որդու մարմինը:
Ինչպես հայտնում է «Ազատություն» ռադիոկայանը, ավելի վաղ քրեակատարողական հիմնարկից նրան ծանրոց է եկել, որտեղ Վլադիսլավի անձնական իրերն են եղել: Դրանց մեջ եղել են թեյ, շաքարավազ, մարտի 8-ը և ծնունդը շնորհավորող չլրացված բացիկներ:
Գերագույն դատարանի պաշտոնական ծանուցումը, որով հայտնում էին, որ Կովալյովի նկատմամբ դատավճիռն ի կատար է ածվել, նրա ընտանիքը ստացել է մարտի 17-ին: Հենց այդ օրն էլ հայտնել են երկրորդ ահաբեկչին` Դմիտրի Կոնովալովին մահապատժի ենթարկելու մասին:
Երկրի օրենքներով՝ մահապատժի ենթարկվածի մարմինն ազգականներին չի տրվում, թաղման ժամանակի ու վայրի մասին էլ ոչինչ չի հայտնվում: Բայց ամեն դեպքում Կովալյովի մայրն իր դիմումում գրում է. «Մեզ Վլադին հրաժեշտ տալու հնարավորություն տվեք, թույլ տվեք նրան հուղարկավորել ուղղափառ քրիստոնեական օրենքների համաձայն»։
Հիշեցնենք, որ Վիտեբսկի բնակիչներ Վլադիսլավ Կովալյովը և Դմիտրի Կոնովալովը մահապատժի էին դատապարտվել անցած տարի Մինսկի մետրոյում պայթյուն իրականացնելու համար։ Այն ժամանակ զոհվել էր 15 մարդ, հարյուրավոր մարդիկ վիրավորվել էին:
Հետաքննության ժամանակ երկուսն էլ մասամբ ընդունել են իրենց մեղքը: Հետագայում դատարանում Կովալյովը հրաժարվել է իր տված ցուցմունքներից՝ հայտարարելով, որ խոստովանությունն արել է ճնշման ներքո:
Երիտասարդներին մահապատժի ենթարկելու մասին լուրը վրդովմունք է առաջացրել Եվրամիությունում, որը կոչ էր անում բելառուսական իշխանություններին մահապատիժ չկիրառել։
