Ինչպես գրում է թուրքական Today’s Zaman թերթը, վեց տարի սպասելուց հետո հայ կինն ի վերջո ամուսնացել է թուրք տղամարդու հետ: Թերթը պատմում է, որ Մուհամեդ Ալի Շիմշեքը Հերմինե Դալմազյանին, որը Հայաստանում մեկ անգամ ամուսնացած էր եղել, հանդիպել է վերջինիս քրոջ տանը, Տրապիզոնում: Մուհամեդի նախորդ կինը մահացել էր ջրհեղեղի ժամանակ` ամուսնու խնամակալությանը թողնելով չորս երեխաներին:
Հերմինեն անմիջապես տեղափոխվել է Մուհամեդի տուն, ընդունել իսլամ, ստացել Այշե անունը, սակայն վեց տարի շարունակ չի կարողացել ամուսնանալ վարչարարական խնդիրների ատճառով: Հերմինեն գումար չի ունեցել, որպեսզի գա Հայաստան և անհրաժեշտ փաստաթղթերը ներկայացնի թուրքական իշխանություններին:
Մուհամեդն ու Այշեն արդեն երկու երեխա ունեն` Ֆաթման և Մուհամեդը: Նրանց ամուսնությանն օժանդակել է տեղի նահանգապետը, որն էլ եղել է նրանց ամուսնության արարողության վկան: Այն կազմակերպվել է տեղի ավանդույթներին համապատասխան:
Վերջին շրջանում այսօրինակ հոդվածները թուրքական մամուլում ավելի հաճախ են տեղ գտնում և ակնհայտորեն կրում են քարոզչական բնույթ` փորձելով ցույց տալ, որ հայ և թուրք ժողովուրդները, եթե իհարկե ցանկանում են, կարող են կողք կողքի ապրել:
