Ադրբեջանական Turan լրատվական գործակալության փոխանցմամբ՝ «Լրագրողներ առանց սահմանների» միջազգային կազմակերպությունը կտրուկ դատապարտել է «Ազատություն» ռադիոկայանի ադրբեջանական ծառայության աշխատակից, լրագրող Հաջիջա Իսմայիլովայի նկատմամբ արդեն մեկ շաբաթ շարունակվող շանտաժը:
Հիշեցնենք, որ մարտի 8-ին Իսմայիլովան իր տնային հասցեով նամակ էր ստացել, որը լի էր ինտիմ լուսանկարներով ու սպառնալիքներով: Նամակում մասնավորապես նշված է եղել, որ եթե նա իրեն լավ չդրսևորի, ապա իրենք խայտառակ կանեն նրան:
Դրանից հետո Իսմայիլովան հայտարարել էր, որ իր համար անակնկալ չի եղել այդպիսի շանտաժը, քանի որ իր լրագրողական գործունեությունը վաղուց անհանգստացնում է կառավարությանը: Նա հիշեցրել էր, որ երկար ժամանակ է, ինչ իրականացնում է լրագրողական հետաքննություն նախագահ Իլհամ Ալիևի ընտանիքի անդամների գաղտնի բիզնեսի շուրջ՝ վեր հանելով ամենաբարձր մակարդակի կոռուպցիոն փաստեր:
Այս կապակցությամբ «Լրագրողներ առանց սահմանների» միջազգային կազմակերպությունը հայտարարություն է տարածել, որում ասվում է. «Սա Ադրբեջանում շանտաժի առաջին դեպքը չէ, որի միջոցով ցանկանում են լռեցնել լրագրողին: Հատկանշական է, որ այդ կամպանիան իրականացվում է իշխանամետ ԶԼՄ-ների զգալի աջակցության պայմաններում:
Դա բացարձակապես անթույլատրելի է, պետք է վերջնականապես վերջ տրվի այդ ամենին: Մենք բոլոր ցանկացողներին կոչ ենք անում ստորագրել Ադրբեջանի կառավարությանը հասցեագրված դիմումի տակ, որում դատապարտվում է Իսմայիլովայի նկատմամբ իրականացվող շանտաժի կամպանիան»:
