Հայաստանի պառլամենտարիզմի կենտրոնի ղեկավար Ռուբեն Թորոսյանը, ով գործընկերների փոխարեն քվեարկելու համար ԱԺ մի խումբ պատգամավորների քրեական պատասխանատվության ենթարկելու միջնորդությամբ ՀՔԾ էր դիմել, «Առաջին լրատվական»-ի հետ զրույցում նշեց, որ ԱԺ նախագահ Սամվել Նիկոյանի՝ այս թեմայով խորհրդարանում կազմակերպած խորհրդակցությունն իրենց չի հետաքրքրում, քանի որ այն հակաօրինական է:
«Այդ խորհրդակցությունն օրենքի սահմաններում չէ, ավելին՝ Նիկոյանը ՀՔԾ-ի պետի հետ միասին խախտել է պառլամենտարիզմի ավանդույթներն ու սահմանադրական կարգը: ՀՔԾ-ի պետը, փաստորեն, Նիկոյանին հանձնարարել է իմ հաղորդումը քննարկել: Մենք հաղորդում ենք ներկայացրել և սպասում ենք, որ այն պատասխան կստանա: Եվ պատասխանը պետք է տա ՀՔԾ-ն, որը, ըստ էության, պատշաճ կերպով չի պատասխանել մեզ: Իսկ Նիկոյանի ու ԱԺ-ի գործունեությունն այս առումով անօրինական եմ համարում»,- ասաց Ռուբեն Թորոսյանը՝ հավելելով, որ իր կողմից տրված հաղորդումն օրենքով սահմանված կարգով, պատասխան պետք է ստանար տասնօրյա ժամկետում, այն է՝ փետրվարի 21-ին:
Հիշեցնենք, որ Հայաստանի պառլամենտարիզմի կենտրոնի նախագահը հաղորդում էր տվել ՀՔԾ-ին՝ ԱԺ փետրվարի 9-ի նիստի քվեարկությունների ժամանակ ԱԺ ՀՀԿ խմբակցության 4 պատգամավորներ` Արա Բաբլոյանի, Հերմինե Նաղդալյանի, Գագիկ Մելիքյանի և Արեգ Ղուկասյանի կողմից ԱԺ կանոնակարգի խախտում թույլ տալու եւ իրենց բացակա գործընկերների փոխարեն քվեարկելու կապակցությամբ նրանց նկատմամբ որևէ միջոց չձեռնարկելու վերաբերյալ:
