Մամուլի ազգային ակումբը «Հասարակական տրամադրությունները Հայաստանում նախընտրական այս փուլում» թեմայի շրջանակներում այսօր լրագրողների հետ հանդիպման էր հրավիրել Հայկական սոցիոլոգիական ասոցիացիայի նախագահ Գևորգ Պողոսյանին:
Լրագրողների հարցին՝ քանի՞ տոկոսն է հավատում, որ առաջիկա խորհրդարանական ընտրությունները արդար
կանցկացվեն, Գևորգ Պողոսյանը պատասխանեց. «Մեծամասնությունը չի հավատում, որ արդար ընտրություններ կանցկացվեն, բայց 75 տոկոսը կողմնորոշված ընտրազանգված է»:
Մեր ընտրողը ավելի խստապահանջ է դարձել. «Այո, սա մեր ընտրողի պարադոքսն է: Բայց միևնույն է՝ մեր ընտրողի մեծամասնության առանձնահատկությունն է: Չգիտեմ ինչ ասեմ` իշխանամե՞տ ենք, պետականամե՞տ ենք, չգիտեմ… Ամեն ինչ կախված է, թե խորհրդարան անցած կուսակցությունները ինչ դաշինքներ կկազմեն՝ ՀԱԿ-ՕԵԿ, թե ԲՀԿ-Դաշնակցություն»,- նկատեց Գ.Պողոսյանը:
«Եթե իշխանությունները իրենց ռեսուրսները օգտագործեն` հնարավոր է՝ անցնեն կուսակցություններ, որոնք որևէ աշխատանք չեն տանում մարզերում և ճանաչում չունեն»,- նշեց սոցիոլոգը` նկատի ունենալով «Ազատ դեմոկրատներ» կուսակցությանը։ Նա նշեց, որ այս կուսակցությունը հարցումներում «ընդհանրապես չի երևում»:
Խորհրդարանական ընտրությունները կլինեն նախագահական ընտրությունների նախերգանքը, և ամեն ինչ կախված կլինի այդ ընտրությունների արդյունքներից:
«ՀԱԿ-ից շատ բան էին սպասում ընտրողները, նրանք արտահերթ նախագահական, խորհրդարանական ընտրություններ էին խոստանում, բայց ոչինչ չեղավ, և այս առումով որոշակի հիասթափություն, որոշակի վստահության անկում կա, բայց, այնուամենայնիվ, ՀԱԿ-ի ռեզերվը զգալի է»,- նշեց սոցիոլոգը` պատասխանելով հարցին, թե հնարավո՞ր է, որ քարոզարշավի ընթացքում ձայները ավելացնի և իր նշած ցածր, բայց անցողիկ շեմը մեծացնի:
Վարդան Օսկանյանի`ԲՀԿ-ին անդամագրվելը ուժեղացնող կոմպոնենտ է, նշեց սոցիոլոգը:
