Այսօր Երևանում մեկնարկել է «Առևտրային արբիտրաժը Հայաստանում» համաժողովը, որին մասնակցում են արդարադատության համակարգի, միջազգային կառույցների, ՀԿ-ների ներկայացուցիչներ: Համաժողովի մասնակցիները քննարկում են ՀՀ արդարադատության նախարարության արբիտրաժային համակարգի զարգացման ծրագրի արդյունքները:
Արդարադատության փոխնախարար Արամ Օրբելյանը կարևորեց արբիտրաժի զարգացումը մեր երկրում, ինչը հնարավորություն կտա զգալիորեն թեթևացնել դատարանները:
«Տնտեսվարողները հնարավորություն կունենան վեճերը լուծել այլընտրանքային եղանակով` արբիտրաժում, մեկ ատյանով, դատավորների և պրոֆեսիոնալի միջոցով, քանի որ տնտեսական վեճերի հիմքում ոչ միայն իրավական գիտելիքների խնդիր է առաջանում, այլև տնտեսագիտական, կոնկրետ ճյուղի իմացության խնդիրներ են առաջանում, և անհրաժեշտություն է ունենալ արբիտրաժ»:
ՀՀ-ում ԵՄ պատվիրակության ղեկավար Տրայան Խրիստեան կարևորեց ՀՀ-ում բիզնես միջավայրի համապատասխանեցումը միջազգային չափանիշներին, ինչը թույլ կտա մասնավոր ներդրողներ ներգրավել:
Փորձագետ Ֆոտիս Կարայանապուլոս ներկայացրեց առևտրային արբիտրաժի համակարգը, ծրագրի արդյունքում արված եզրակացությունները:
Առաջարկվում է ՀՀ-ում հիմնել Արբիտրաժային ինստիտուտ, որը ԱՆ համակարգում կունենա մշտական գործող մարմին` քարտուղարություն, ներկայացուցչական մարմին` խորհուրդ, աշխատանքային կոմիտե, արբիտրների հավաստագրման հանձնաժողով և այլն: Առաջարկվում է նաև փոփոխություններ կատարել «Առևտրային արբիտրաժի մասին» օրենքում:
