Aravot.am-ը տեղեկացրել էր, որ Սպարապետ Վազգեն Սարգսյանի եղբայրը՝ «Հանրապետություն» կուսակցության քաղխորհրդի նախագահ Արամ Սարգսյանը, առաջին անգամ ԵԿՄ-ից այդ կազմակերպության շաբաթ օրը տեղի ունեցած համագումարին մասնակցելու հրավեր չէր ստացել:
«Թե ինչու՝ մեր խնդրանքով պարզաբանեց ԵԿՄ վարչության նախագահ, գեներալ Մանվել Գրիգորյանի խորհրդական Վարդան Վարդանյանը: Նրա մատուցմամբ` ԵԿՄ-ն համագումարին ներկա լինելու հրավեր ուղարկել էր Սպարապետի ծնողներին, Վազգեն Սարգսյանի կրտսեր եղբայրն էլ՝ Արմեն Սարգսյանը, լինելով ԵԿՄ անդամ, մասնակցել է համագումարին և վերընտրվել է «Երկրապահների» ղեկավար մարմնի՝ վարչության կազմում:
Ինչ վերաբերում է կոնկրետ Արամ Սարգսյանին, ապա, Վարդանյանի ասելով, ԵԿՄ-ում դրա վրա չեն էլ սևեռվել՝ թերևս, ավելորդ ձևականություն համարելով, որովհետև ԵԿՄ-ն Արամ Սարգսյանի ավագ եղբոր՝ Սպարապետ Վազգեն Սարգսյանի հիմնադրած կազմակերպությունը, տունն է, ուր Արամ Սարգսյանը կարող է մտնել առանց հրավերի, տան տիրոջ իրավունքով:
«Գուցե, մենք իսկապես թերացել ենք ու պիտի հատուկ հրավիրեինք, բայց բոլոր դեպքերում որևէ միտում այստեղ չի եղել և չկա: Արամ Սարգսյանը, բացի այն, որ միության անդամ է, նաև ԵԿՄ-ում միշտ սպասված մարդ է, նա կարող է ցանկացած պահի և առանց հրավերի գալ ԵԿՄ, մասնակցել համագումարներին, անգամ որոշել՝ ում հրավիրել և այլն»,- ասել է Վարդան Վարդանյանը:
