ՀՀ նախկին արտգործնախարար Վարդան Օսկանյանը չի բացառում, որ կարող է անդամակցել «Բարգավաճ Հայաստան» կուսակցությանը:
«168 ժամ»-ի հետ զրույցում նա ասել է, թե ԲՀԿ-ի հետ համագործակցության վերջնական որոշում դեռ չի կայացրել, բայց այդ ուղղությամբ քննարկումները բավականին խորացել են:
«Իսկ ինչո՞ւ է ուզում համագործակցել հատկապես ԲՀԿ-ի հետ. այս հարցին Վարդան Օսկանյանը պատասխանել է, «Իմ տպավորությունն է, և հուսով եմ, որ չեմ սխալվում, որ ԲՀԿ-ն իշխանություն ունենալու դեպքում պետական համակարգում կներգրավի բացառապես այնպիսի մարդկանց, որոնք փորձ ունեն, կարող են, պատրաստակամ և ազնիվ են՝ անկախ այն հանգամանքից, թե այդ մարդիկ ինչպիսի քաղաքական ճանապարհ են անցել:
Երկրորդ` մեր հասարակությունը ԲՀԿ-ին ընդունում է ոչ թե որպես ընդդիմություն, այլ որպես այլընտրանք գործող իշխանությանը:
Երրորդ` իմ դիտարկումներով` ամենաբարձր վարկանիշն ու հեղինակությունը այսօր ԲՀԿ-ն ունի: Այս փուլում ԲՀԿ-ին առավել ուժեղացնելով՝ ես կարծում եմ, որ մենք՝ հասարակությունը, նոր խորհրդարանում քաղաքական իրավիճակը փոխելու առավել մեծ հնարավորություն ենք ստանում»,- հավելում է թերթը:
