CNN Türk-ին տված հարցազրույցի ժամանակ Թուրքիայում Ֆրանսիայի դեսպան Լորեն Բիլին հայտարարել է, որ ֆրանսիական մարտական ինքնաթիռներն ու ռազմանավերն այլևս չեն օգտվում Թուրքիայի օդային տարածքից ու տարածքային ջրերից:
Նա հավելել է, որ թուրքական կառավարությունը 3 անգամ իրենց մերժել է տվյալ հարցում, որից հետո իրենք այդ հարցով այլևս չեն դիմում Թուրքիային և օգտվում են այլընտրանքային երթուղիներից:
Դեսպանը նկատել է, որ իրենք առաջին մերժումը ստացել են այն ժամանակ, երբ ֆրանսիական մարտական ինքնաթիռը Ֆրանսիայից Աֆղանստան մեկնելու համար փորձել է օգտվել Թուրքիայի տարածքից: Ապա ֆրանսիական երկու ռազմանավերի չի թույլատրվել մուտք գործել Թուրքիայի տարածքային ջրեր:
Հիշեցնենք, որ նախորդ տարվա դեկտեմբերի 22-ին Ֆրանսիայի Ազգային ժողովի կողմից Հայոց ցեղասպանության հերքումը քրեականացնող օրինագծի ընդունումից հետո Թուրքիան 8 կետանոց պատժամիջոցներ էր սահմանել Ֆրանսիայի նկատմամբ, որոնց թվում էր նաև ֆրանսիական ինքնաթիռների և ռազմանավերի համար թուրքական տարածքից օգտվելու արգելքը:
