Ստենֆորդի համալսարանի հոգեբաններն ուսումնասիրել են ամերիկացի քրիստոնյաների պատկերացումները Հիսուսի մասին և պարզել, որ դրանք սերտ կապված են քաղաքական պատկերացումների հետ: Հետազոտողների հոդվածը հայտնվել է Proceedings of the National Academy of Sciences ամսագրում:
Հետազոտության շրջանակում իրենց քրիստոնյա համարող 800 մարդկանց շրջանում գիտնականները անցկացրել են օնլայն հարցում: Նրանց կեսը բողոքական էր, մեկ չորրորդը՝ կաթոլիկ, իսկ մնացած մեկ չորրորդը` քրիստոնեության այլ ուղղության ներկայացուցիչ: Յուրաքանչյուր կամավորի առաջարկվել է հարցման թերթիկ` ներառելով նաև քաղաքական ու տնտեսական հարցեր, ինչպես նաև մի շարք հարցեր, որոնցով մասնակիցները պետք է որոշեն, թե ինչպես իրեն կպահեր Հիսուսը այս կամ այն իրավիճակում:
Արդյունքում գիտնականները պարզել են, որ և՛ պահպանողականները, և՛ լիբերալները համոզված են, որ ժամանակակից Հիսուսը կլիներ հենց իրենց նախընտրած քաղաքական հայացքների տեր: Յուրաքանչյուր խումբը նշել է, որ որոշ հարցերի շուրջը Փրկչի հետ չունի համանման կարծիք, օրինակ` պահպանողականները համաձայն չեն հարստության հավասար բաժանման գաղափարի հետ, իսկ լիբերալները` արհեսական վիժումների և միասեռ ամուսնությունների հարցերի:
Միևնույն ժամանակ, լիբերալները և պահպանողականները կարծում են, որ այն հարցերը, որոնցում տարակարծիք են Հիսուսի հետ, երկրորդական են: Երկու խմբերն էլ հակված են հավատքի կենտրոնական հարցեր անվանել նրանք, որոնց դեպքում նրանց կարծիքը համընկնում է համաքրիստոնեական պատկերացումների հետ:
Գիտնականները այս մոտեցումն անվանում են սեփական տեսակետների պրոյեկցիա: Հետազոտողների կարծիքով՝ այս պրոյեկցիայի հիմնական նպատակը քաղաքական և կրոնական պատկերացումների միջև առաջացած հակասությունները հարթելն է: Ինչպես ցույց է տվել հետազոտությունը, ինչքան մարդ կրոնական է, այնքան իր սեփական համոզմունքները վերագրում է Քրիստոսին:
