Ուկրաինայի նախագահն այսօր ոչ մի գթասրտություն չի ցուցաբերել նախկին վարչապետ Յուլյա Տիմոշենկոյի նկատմամբ, չնայած այն ահագնացող մտավախությանը, որ նրա ազատազրկումը կարող է վնասել երկրի տնտեսությանը և ԵՄ-ի հետ հարաբերություններին:
Ինչպես գրում է Associated Press-ը, նախագահ Վիկտոր Յանուկովիչը Շվեյցարիայում տեղի ունեցող Համաշխարհային տնտեսական ֆորումի ժամանակ ասել է, որ Ռուսաստանի հետ Տիմոշենկոյի կնքած գազային պայմանագիրն Ուկրաինայի ամենամեծ խնդիրն է այսօր: Նա ավելացրել է, որ նախկին վարչապետին դատական նոր խնդիրներ են սպասվում:
Տիմոշենկոն, ով ներկայիս նախագահի ոխերիմ թշնամին է, դատապարտվել է 7 տարվա ազատազրկման՝ իր պաշտոնը չարաշահելու մեղադրանքով: Նրա ընտանիքը մեղադրում է բանտի ղեկավարությանը՝ նրան անհրաժեշտ բժշկական օգնություն չտրամադրելու համար:
