Մարդու իրավունքների ոլորտում դրական տեղաշարժ չկա: «Առաջին լրատվական»-ի հետ զրույցում նման տեսակետ հայտնեց փաստաբան Սեդա Սաֆարյանը`խոսելով երեկ Human Rights Watch կազմակերպության հրապարակած զեկույցի մասին:
Փաստաբանը համակարծիք է կազմակերպության ներկայացրած բոլոր մտահոգություններին, սակայն միանշանակ չի ընդունում կազմակերպության գնահատականները: «Ես կարծում եմ, որ նրանց գնահատականները բավականին մոտ են իրողությանը, բայց չեմ ասի, թե ամբողջությամբ ճիշտ որակումներ են: Այսինքն՝ այն, ինչ տեսնում ենք մենք, տեսնում են նաև իրենք»,- ասաց Սաֆարյանը:
Նրա խոսքով` մարդու իրավունքների ոլորտի իրավախախտումները լավ արտահայտվում են քրեական գործերի շրջանակում: «Իրավունքի պաշտպանությունը դարձել է կամայականություն: Ես համակարծիք եմ, որ մարդկանց իրավունքները ոտնահարվում են: Ես արդարադատության հետ եմ առնչվում, և եթե արդարադատության ոլորտում կամայականություններ կան, մյուս բոլոր ոլորտները չկան: Սա շատ առաջնային, կարգավորիչ ոլորտն է: Եթե արդարադատությունն այն վիճակում է, որ նույնիսկ ես չեմ հավատում մեր իրականացրած արդարադատությանը, լիարժեքության մասին խոսք չի կարող լինել, վստահություն այդ մարմինների նկատմամբ մեր ժողովուրդը չունի»,- նշեց Սեդա Սաֆարյանը`հավելելով, որ քրեական գործերի 90% հավանականության վերաբերյալ նույնպես ոչինչ չես կարող ասել մարդուն, որովհետև կարող է գործել 10% հավանականությունը:
Հիշեցնենք, որ երեկ իրավապաշտպան Human Rights Watch կազմակերպությունը հերթական տարեկան զեկույցը ներկայացրեց, որում նշել էր, որ Հայաստանի իշխանությունները շարունակում են ոտնահարել մարդու իրավունքները, մինչդեռ միջազգային գործընկերները ամբողջովին չեն օգտագործում իրենց ազդեցության լծակները՝ իրավիճակը բարելավելու համար: Զեկույցում նշվում էին նաև մահացությունները անազատության վայրերում և այլն:
