Թուրքական Hürriyet թերթի փոխանցմամբ, Կոպենհագենի քաղաքային դատարանը հետ չի վերցրել Դանիայի տարածքից հեռարձակվող քրդական Roj TV հեռուստաալիքին հատկացված հեռարձակման արտոնագիրը, չնայած Թուրքիայի կառավարության ու տեղի դատախազի պահանջին։
Դատարանը որոշել է սահմանափակվել 400,000 եվրո (ըստ Reuters-ի՝ 22,000 դոլար, ինչը հավասար է 130,000 դանիական կրոնի) տուգանքի նշանակմամբ։ Նշվում է, որ Roj TV արբանյակային հեռուստաալիքը ֆինանսավորվում է Թուրքիայում, ԱՄՆ-ում ու ԵՄ-ում ահաբեկչական հռչակված «Քրդստանի աշխատավորական» կուսակցության (PKK) կողմից։
Դանիան տվյալ հեռուստաալիքին հեռարձակման արտոնագիր է տվել դեռևս 2004 թվականին։ Դանիայի տարածքից այն հեռարձակվում է աշխարհի 68 երկրներում, թեև սեփական հեռուստաստուդիա չունի։ Թուրքական կողմը պնդում է, որ այդ հեռուստաալիքն աջակցում է ահաբեկչությանը։ Այդ կապակցությամբ Դանիայում Թուրքիայի դեսպան Ահմեդ Բերքի Դիբեքը կոչ էր արել կասեցնել հեռուստաալիքի հեռարձակումը, սակայն կոչն անարձագանք մնաց։
