Դեկտեմբերի 28-ին Հունաստանում Հայաստանի Հանրապետության դեսպանությունում տեղի է ունեցել հայ գրատպության 500-ամյակի նախատոնական միջոցառում, որտեղ ցուցադրվել են հունահայ արվեստաբան, թարգմանիչ պարոն Հակոբ Ջելալյանի հավաքածուից հայերեն հնատիպ գրքերի, ինչպես նաեւ Հայաստանին առնչվող հայ և օտար հեղինակների վիմանկարների 17-19-րդ դարերի բացառիկ նմուշներ:
ՀՀ ԱԳՆ մամլո գրասենյակից «Առաջին լրատվական»-ին տեղեկացնում են, որ ՀՀ դեսպան Գագիկ Ղալաչյանն իր ելույթում ներկայացրել է հայ գրատպության պատմությունը, խոսել Հայաստանի Հանրապետության մայրաքաղաք Երևանը ՅՈՒՆԵՍԿՕ-ի կողմից 2012թ. գրքի համաշխարհային մայրաքաղաք հռչակման և 2012թ. ամբողջ աշխարհում Հայ գրատպության 500-ամյակի առթիվ նախատեսվող միջոցառումների մասին:
ՀՀ դեսպանը հունահայ համայնքի ներկայացուցիչներին է հանձնել ՀՀ մշակույթի և սփյուռքի նախարարությունների կողմից ՀՀ անկախության 20-ամյակի առթիվ շնորհված պարգևները:
Հ. Ջելալյանը պարգևատրվել է ՀՀ մշակույթի նախարարության ոսկե մեդալով, ՀՅԴ Հունաստանի կենտրոնական կոմիտեի ներկայացուցիչ Գևորգ Քոլանյանին հանձնվել է ՀՀ սփյուռքի նախարարության ոսկե մեդալը, իսկ «Հայաստան» համահայկական հիմնադրամի Հունաստանի մասնաճյուղի ատենապետ Վաչե Տեր-Կարապետյանը և պրն Հայկ Զաքյանը պարգևատրվել են ՀՀ սփյուռքի նախարարության «Պողոս Նուբար» մեդալով:
ՀՀ սփյուռքի նախարարության պատվոգրեր են հանձնվել «Արմենիկա» հանդեսի խմբագիր Մայք Չիլինգիրյանին, հայ-հունական հետազոտությունների կենտրոնի ներկայացուցիչ Հովսեփ Քասեսյանին և պարոն Սերգո Գույումջյանին:
Պաշտոնական արարողությանը հետևել է գեղարվեստական մաս:
Ցուցահանդեսը բաց է այցելության համար մինչև հունվարի 13-ը:
