Պակիստանի նախկին նախագահ Փերվեզ Մուշարաֆը հայտարարել է, որ 2012 թ. հունվարին ինքնակամ կվերադառնա հայրենիք: Ինչպես գրում է The Express Tribune թերթը, համապատասխան հայտարարություն Մուշարաֆն արել է Պակիստնի Լահոր քաղաքում գտնվող իր կողմնակիցների հետ հեռուստակամուրջի ժամանակ: Մուշարաֆի խոսքերով՝ իր հայրենիքում իրադրությունը զարգանում է «ոչ ժողովրդավարական սցենարով»: Այս կապակցությամբ՝ նախկին նախագահը զգուշացրել է, որ «բանակի ներգրավումը քաղաքականության մեջ երկրի համար կդառնա ճակատագրական»:
Նախկին նախագահը անհանգստություն է հայտնել նաև այն առնչությամբ, որ «որոշ տարրեր» դավադրություն են հյուսում բանակի և հետախուզական ծառայությունների դեմ: Բացի այդ, նրա կարծիքով՝ երկրի ներկա իշխանությունները չեն կարողանում ադեկվատ արձագանքել ստեղծված իրադրությանը:
Իսկ իր մասին Մուշառաֆը ասել է հետևյալը. «Ես Պակիստանը տարել եմ բարգավաճման ճանապարհով, կայունացրել եմ տնտեսական դրությունը, բարելավել երկրի հեղինակությունն աշխարհում»: Նրա խոսքերով՝ այդ ամենը չնչին են դարձնում իր հասցեին կոռուպցիայի բոլոր մեղադրանքները: «Ոչ ոք չի կարող ապացուցել ինձ վերաբերրող կաշառակերության ոչ մի մեղադրանք»,- ասել է նա:
Վերջին օրերին Պակիստանը լուրջ քաղաքական ճգնաժամի մեջ է հայտնվել, որի պատճառ է հանդիսացել երկրի կառավարության կողմից Վաշինգտոնին ուղարկված գաղտնի նամակը: Փաստաթղթում Պակիստանի քաղաքական ղեկավարությունը ԱՄՆ-ից խնդրում է օգնություն ցուցաբերել պակիստանյան հատուկ ծառայությունների և բանակի գեներալների դեմ պայքարում, որոնց ձեռքերում զգալի ռեսուրսներ և իշխանություն է կենտրոնացված: Փոխարենը՝ կառավարությունը խոստացել ամերիկամետ քաղաքականություն վարել:
Այդ նամակի բացահայտումը բողոքի մեծ ալիք բարձրացրեց պակիստանյան հասարակության մեջ: Տեղի մամուլը գրում էր, որ երկրում հնարավոր է նոր ռազմական հեղաշրջում:
Իսլամաբադում կատարվող իրադարձությունների պատճառով շտապ երկիր վերադարձավ ԱՄԷ-ում բուժման կուրս անցնող նախագահ Ասիֆ Ալի Զարդարին:
Գեներալ Փերվեզ Մուշարաֆն ինքն է կանգնած եղել 1999 թ. ռազմական հեղաշրջման գլուխ: 2008 թ. ընդդիմության ճնշման տակ նա ստիպված էր հրաժարական տալ և լքել երկիրը: 2009 թ. նրա դեմ հարուցվեց առաջին քրեական գործը՝ դատավորների անօրինական տեղափոխությունների համար, իսկ 2011 թ. ևս մեկ դատական գործ բացվեց նրա դեմ՝ ընդդիմության առաջնորդ Բենազիր Բհուտտոյի սպանության մեղադրանքով:
Վերջին տարիներին Մուշարաֆն ապրում էր ԱՄԷ-ում և Լոնդոնում:
