Iran News-ի փոխանցմամբ՝ ԵՄ-ի կողմից իրանական նավթի ներկրման նկատմամբ հավելյալ պատժամիջոցների սահմանումը Իրանին կարող է զրկել նավթի արդյունահանման մեկ քառորդից։ Այս մասին նշված է Միջազգային էներգետիկ գործակալության (International Energy Agency (IEA)) երեկ հրապարակած զեկույցում, որն առնչվում է նավթի համաշխարհային շուկայի ներկայիս իրավիճակին ու հեռանկարներին։
IEA-ի փորձագետների գնահատմամբ՝ նոր պատժամիջոցները Իրանի նավթային արդյունաբերության ոլորտի վրա կնստեն օրական 890,000 բարել նավթ։ Զեկույցում նշված է, որ եթե իրանական նավթի գլոբալ բեռնարգելքն ընդլայնվի, կամ սահմանափակվեն Իրանի Կենտրոնական բանկի հետ գործարքները, ապա դա կարող է հանգեցնել ոչ միայն նավթի թանկացմանը, այլև նվազեցնել Իրանի կողմից վաճառվող «սև ոսկու» ծավալը։
Եթե ԵՄ-ը բեռնարգելք դնի իրանական նավթի ներկրման վրա, ապա դա կհանգեցնի Սաուդյան Արաբիայից, Իրաքից ու Ռուսաստանից ներկրվող նավթի թանկացմանը։ Միևնույն ժամանակ ասիական երկրները կօգտվեն դրանից և կավելացնեն նվազած գնով իրանական նավթի գնման ծավալը։
IEA-ի զեկույցում նշված է, որ 2011 թվականի նոյեմբերին նավթի արդյունահանումը համայն աշխարհում ավելացել է 900,000 բարելով (օրական)՝ կազմելով օրական 90 միլիոն բարել։
