«Տեր-հնազանդ» արտահայտության մեջ տիրելու և ստրկացնելու միտում չկա: Այսօր լրագրողների հետ հանդիպմանը տեղեկացրեց տեր Շմավոն քահանա Ղևոնդյանը` խոսելով կին-տղամարդ սեռային խտրականության մասին:
Նրա խոսքով` քրիստոնեությունն այն կրոններից է, որն ի սկզբանե այդ հավասարությունը սահմանել է: «Պողոս Առաքյալն ասում է` բոլորը հավասար են: Սակայն մենք չպետք է մոռանանք, որ մարդիկ արարվեցին երկու սեռի: Եթե Աստված յուրաքանչյուր սեռին տվել է իր գործառույթները, պետք չէ Աստծուց ավելի խելացի փորձել երևալ. կնոջը և տղամարդուն կան տրված գործառույթներ»,- նշեց քահանան`հավելելով, որ «տեր եմ» երդումը ամենևին իշխել իմաստով չի ասվում: Ըստ նրա` դա ասվում է հոգ տանելու և սիրելու նպատակով: Պողոս առաքյալը հորդորեց` ընտանիքի կառուցման գործում յուրաքանչյուրն իր անելիքն ունի:
Անդրադառնալով ԱԺ առաջին ընթերցմամբ քննարկված օրենքի նախագծին, որը նախատեսում է բոլոր ոլորտներում կնոջ և տղամարդու միջև հավասարություն` քահանան ասաց, որ օրինագծին դեմ չէ:
«Սակայն ես գիտեմ, որ կան ոլորտներ, որտեղ կինը չի կարող աշխատել: Մենք չենք տեսել կին-շինարար կամ տղամարդուն բնորոշ գործ կատարող»,- մեկնաբանեց տեր Շմավոն քահանա Ղևոնդյանը:
ՀՀ ԱԺ-ում քննարկվեց նախագիծ կնոջ և տղամարդու հավասարության պետական երաշխիքների մասին. կինը «տե՞ր » է, թե՞ «հնազանդ»: Այս մասին խոսեցին նախագծի համահեղինակ, ԱԺ ՕԵԿ խմբակցության պատգամավոր Հովհաննես Մարգարյանը և տեր Շմավոն քահանա Ղևոնդյանը:
