Ադրբեջանական Salam News գործակալության փոխանցմամբ՝ Ադրբեջանում Իրանի դեսպանատան մամլո ծառայությունը հայտնել է, որ տեղեկություններ չունի Ադրբեջանի տարածքում ահաբեկչական խմբավորման տեղակայման մասին։
Իսկ Իրանի ԱԳՆ-ի ներկայացուցիչ Ռամին Մեհմանպարաստը մամլո ասուլիսի ժամանակ, պատասխանելով Ադրբեջանի տարածքում «Ժողովրդական մոջահեդներ»-ի խմբավորման բազավորման մասին հարցին, հայտարարել է, որ այդ մասին պաշտոնական տեղեկատվություն չկա.
«Որոշ ԶԼՄ-ներ տարածում են նմանատիպ ապատեղեկատվություն՝ իրանա-ադրբեջանական ջերմ հարաբերությունները խաթարելու նպատակով։ Ոչ մի երկիր իրեն թույլ չի տա այնպիսի քայլեր ձեռնարկել, որոնք սպառնալիքի տակ կդնեն երկրի անվտանգությունը։ Հակառակ դեպքում վնաս կպատճառվի երկու երկրների անվտանգությանը»։
Հիշեցնենք, որ երեկ էլ Ադրբեջանում Իրանի դեսպանատունը հերքել էր ադրբեջանցի հակաիսլամիստ գրող-հրապարակախոս Ռաֆիկ Թագիի դեմ կատարված մահափորձում իր երկրի մասնակցությունը՝ այդ հարցում Իրանի անվան հիշատակումը որակելով որպես երկու երկրների ռազմավարական գործընկերությանը վնաս հասցնելու փորձ։
