Պաշտպանության նախկին փոխնախարար, ՀՅԴ խմբակցության անդամ Արթուր Աղաբեկյանը համոզված է, որ հայկական կողմն այլընտրանք չունի և ղարաբաղա-ադրբեջանական շփման գծում ադրբեջանցիների գնդակից հայ զինծառայողների զոհվելու պարագայում հակառակորդին պետք է խոցել ոչ պակաս, քան նույն զենքով: Նման համոզմունք նա հայտնեց «Առաջին լրատվական»-ի հետ զրույցում՝ նկատելով, որ «ոչ պակաս, քան նույն զենքով» արտահայտությունն ինքը գործածում է փոխաբերական իմաստով:
«Դիպուկահարների պատերազմը վաղուց է սկսել: Երկու տարուց ավել է՝ հակառակորդի գործողություններում դիպուկահարների գործունեությունը հստակ տեղ է գրավում: Կարծում եմ՝ Հայաստանի ՊՆ-ն անհրաժեշտ հետևություն արել է, և պետք է ավելի լուրջ դրսևորում լինի, որպեսզի հակառակորդը հասկանա, որ բացի զինադադարի ռեժիմը՝ այլընտրանք չունի և պետք է հաշտվի այդ մտքի հետ: Զինադադարից հետո կրակը միշտ էլ եղել է, փոխհրաձգությունը շարունակվում է: Ակնհայտ երևում է, որ ադրբեջանական կողմից տեղի է ունենում զենքի կատարելագործում, և համարժեք պատասխան տալու համար մերոնք պետք է նույն ճանապարհն ընտրեն: Միայն այդ ճանապարհով է հնարավոր զսպել թշնամուն, մենք այլընտրանք չունենք: Հավատացեք՝ դա է հարցի լուծումը:
Ադրբեջանի տոտալիտար հասարակարգն ամիսներ, տարիներ առաջ թքած ուներ՝ քանի ադրբեջանցի զինվոր է զոհվում դիրքերում, բայց հիմա վիճակը փոխվել է: Այդ հասարակությունը կամաց-կամաց սկսում է պահանջատեր դառնալ և հաշիվ պահանջել զոհված զինծառայողների համար: Դա ակնհայտ է: Միայն այս ճանապարհով կարող ենք լռեցնել Ադրբեջանի քաղաքական և զինվորական իշխանություններին»,- նկատեց Արթուր Աղաբեկյանը:
Նրա խոսքով, պակաս կարևոր խնդիր չէ զինվորական կառույցների կատարելագործումը, որը «ցանկացած հրամանատարի սուրբ գործն է»: «Իրականում պետք է արվի ամեն ինչ, որպեսզի բանակի խոցելիության աստիճանն իջնի զրոյի: Այդ առումով մեծ անելիք ունեն մարտական ստորաբաժանումների հրամանատարները, Զինված ուժերի ղեկավարները»,- ամփոփեց պաշտպանության նախկին փոխնախարարը:
