News Georgia-ի փոխանցմամբ՝ ԱՄՆ-ը հայտարարել է, որ չի ճանաչում կիրակի օրը Հարավային Օսիայում տեղի ունեցած նախագահական ընտրությունները։ Այս մասին ճեպազրույցի ժամանակ հայտարարել է ԱՄՆ պետդեպարտամենտի ներկայացուցիչ Մարկ Տոները.
«ԱՄՆ-ը չի ճանաչում նոյեմբերի 13-ին վրացական Հարավային Օսիա շրջանում տեղի ունեցած, այսպես կոչված, նախագահական ընտրությունների ու հանրաքվեի օրինականությունն ու արդյունքները։ Մենք նախկինի նման աջակցում ենք միջազգայնորեն ճանաչված սահմաններում Վրաստանի տարածքային ամբողջականությանն ու ինքնիշխանությանը»։
Հիշեցնենք, որ կիրակնօրյա ընտրությունների արդյունքում 11 թեկնածուներից ոչ մեկին չի հաջողվել հավաքել քվեների կեսը, ուստի նոյեմբերի 27-ին պետք է տեղի ունենա երկրորդ փուլը, որին մասնակցելու են Ալլա Ջիոևան, որը ստացել է ձայների 24.6 տոկոսը, և Անատոլի Բիբիլովը, որը ստացել է քվեների 23.8 տոկոսը։ Հանրաքվեի արդյունքներով էլ որոշվել էր Հարավային Օսիայում ռուսերենին շնորհել պետական լեզվի կարգավիճակ։
Ի դեպ, երեկ Հարավային Օսիայի նախագահական ընտրությունների չճանաչման մասին ազդարարել են ՆԱՏՕ-ն (Անդերս Ֆոգ Ռասմուսեն) և ԵՄ-ն (Քեթրին Էշթոն)։
