Քիչ առաջ մեկնարկեց «Անչափահասների գործերով դատավարությունների դիտարկում» զեկույցի շնորհանդեսն ու քննարկումը: Զեկույցն անդրադառնում է 45 գործի, որոնցում որպես ամբաստանյալներ ներգրավված են անչափահասները։ Այն նաև վերլուծում է ՀՀ օրենսդրությունն ու պրակտիկան, ինչպես նաև տարբեր կազմակերպությունների համագործակցությունը անչափահասների արդարադատության համակարգի կատարելագործման ճանապարհին ընկած բացերը բացահայտելու և առաջարկություններ ներկայացնելու համար:
Ծրագիրն իրականացվել է «Քաղաքացիական հասարակության ինստիտուտ» հասարակական կազմակերպության կողմից՝ ԵԱՀԿ երևանյան գրասենյակի աջակցությամբ:
Զեկույցի շնորհանդեսին բացման խոսքով հանդես եկավ Քաղաքացիական հասարակություն ինստիտուտ ՀԿ-ի նախագահ Արման Դանիելյանը, որը նշեց, որ քննարկման ընթացքում մասնակիցներն առաջարկելու են արդարադատության հաստատման տարբեր մոդելներ` ուսումնասիրելով միջազգային փորձը:
«Մեզ՝ որպես արդարադատություն իրականացնող մարմնի, հետաքրքրիր է այս զեկույցը։ Այն կնպաստի ՀՀ ժողովրդավարության հաստատմանը, և անչափահասների գործերի դիտարկումը դրական ազդեցություն կունենա»,- իր խոսքում նշեց ՀՀ վճռաբեկ դատարանի դատավոր Ելիզավետա Դանիելյանը` հավելելով, որ քննարկվելքի բոլոր խնդիրները կարևոր են համակարգի զարգացման և իրավունքների հաստատման համար:
Շնորհանդեսի ընթացքում մասնագետները նաև կքննարկեն «Անչափահասների գործերով արդարադատությունը Հայաստանում. օրենքի հետ կոնֆլիկտ ունեցած անչափահասների տեսակետները» հետազոտությունը, որի նպատակն է նպաստել երեխաների մասնակցությանը և գնահատել անչափահասների արդարադատության համակարգը երեխաների տեսանկյունից: Այն հանդիսանում է ՄԱԿ-ի մանկական հիմնադրամի հովանավորությամբ իրականացված հետազոտության մաս։ Զեկույցի ընթացքում կներկայացվի մեթոդաբանությունը, արդյունքների ամփոփումը։ Կլինեն նաև առաջարկություններ և հոգեբանական վերլուծություն:
