Грузия Online-ի փոխանցմամբ՝ Վրաստանի կառավարությունը հաջորդ տարվա համար պլանավորել է իրագործել մի շարք էներգետիկ կարևոր նախագծեր։ Այս մասին այսօր Բաթումում տեղի ունեցած կառավարական նիստում հայտարարել է Վրաստանի վարչապետ Նիկա Գիլաուրին։
Վերջինիս խոսքերով՝ հաջորդ տարի Վրաստանում մեկնարկելու է նվազագույնը 6, առավելագույնը՝ 11 հիդրոէլեկտրակայանի (ՀԷԿ) կառուցում. «Այս տարի Վրաստանում արդեն իսկ ընթանում է 10 նոր ՀԷԿ-երի կառուցումը։ Ապագայում դրանց թիվն ավելանալու է, ինչը նպաստելու է նոր աշխատատեղերի կառուցմանը։ Վերջին հաշվով, այդ ամենի շնորհիվ կստեղծվի մինչև 15,000 աշխատատեղ»։
Հիշեցնենք, որ այս տարվա սեպտեմբերի կեսին էլ Սաակաշվիլին հայտարարել էր, թե համաշխարհային շուկայում իրենց նշանը պետք է դառնա հիդրոէլեկտրակայանների (ՀԷԿ) շինարարությունը. «Հիդրոէներգետիկայի տեսանկյունից մենք 1980-ական թվականներին գտնվում էինք համաշխարհային մակարդակի վրա։ Այժմ մենք տեխնոլոգիական առումով որոշակի հետընթաց ենք ապրել, դրա համար էլ պետք է մեծ ուշադրություն հատկացնենք դրան։ Մեր «նոու-հաու»-ն պետք է լինի լավ շինարարությունը։
Մենք արդեն սովորել ենք կառուցել ամենաարագ տեմպերով, հնարավոր է՝ մենք անցնենք թուրքերին ու հասնենք չինացիներին։ Կատարելապես իրատեսական է այն նպատակը, որ համայն աշխարհում ամենաարագ ու որակյալ ձևով ՀԷԿ-եր կառուցելու են վրացիները։ Դրա համար մենք պետք է մարդկանց գործուղենք Եվրոպա, Ասիա և Աֆրիկա։ Մենք հետամնաց, տնտեսապես անփորձ երկիր չենք, որ օտարերկրացին գա այստեղ և ինչ-որ բան կառուցի»։
