«Այսօր տրամաբանական է ակնկալել ԱԻՄ-ի և և ՀՀԿ-ի համագործակցությունը. սա շատ շահեկան կարող է լինել նույն ՀՀԿ-ի համար, ով ընտրությունների ժամանակ 51 տոկոս կարող է հավաքել միայն խախտումների ճանապարհով»,- այսօր տեղի ունեցած ասուլիսի ժամանակ հայտարարեց ԱԻՄ նախագահ Պարույր Հայրիկյանը:
«Այսօրվա դրությամբ մենք բոլոր քաղաքական ուժերին Հայաստանն ազատ դարձնելու նախագիծ ենք ուղարկել` վերնագրված որպես «Կատարյալ ժողովրդավարական համակարգ»: Չնայած մենք երբեք չէինք ասել, որ պատրաստ ենք առաջ գնալ ՀՀԿ-ի հետ, բայց այդպես ստացվեց: Միաժամանակ, ՀՀԿ-ն անցյալի համար առարկայական ցավ պիտի հայտնի, այլապես համագործակցությունը խաբուսիկ կլինի: Մենք ոչ ոքի հետ վերջնական պայմանավորվածություն չունենք, որովհետև մեզ համար ոչ թե իշխանական աթոռն է կարևոր, այլ ազգային նպատակը: Ես որևէ հավակնություն չունեմ, նույնիսկ կարող եմ որպես պատգամավոր չառաջադրվել: Կամ բարձր սկզբունքներ, կամ՝ ոչինչ: Ինձ հետ բանակցելիս միայն մի հարցում պետք է բանակցել` ընդունո՞ւմ են իմ այս նախագիծը, թե՝ ոչ:
Չի կարելի բացառել նաև Ռոբերտ Քոչարյանի հետ մեր համագործակցությունը: Պարզապես նա պիտի ապացուցի, որ Մարտի 1-ի հետ կապ չունի և պատասխան տա դրա համար: Քաղաքական բոլոր ուժերին ուղարկված առաջարկի կապակցությամբ արձագանք ստացել ենք գրեթե բոլորից, այդ թվում` նաև ՀՀԿ-ից: Իսկ պատասխանն այսպիսին է՝ նախագահը մեր առաջարկին կանդրադառնա առաջին հարմար առիթով»,- նկատեց Պարույր Հայրիկյանը:
ԱԻՄ ղեկավարը նաև նշեց, որ հնարավոր է, կուսակցության գործունեությունը ժամանակավորապես սառեցվի, և ամեն բան սկսվի զրոյից: «Մենք համարում ենք, որ Հայաստանում կուսակցություններ չկան, իսկ ԱԻՄ-ն էլ չի ցանկանում միակը լինել դաշտում: Այնուամենայնիվ, մեր նախագծի շրջանակներում ԲՀԿ-ի ղեկավարն է խնդրել հանդիպել, հանդիպել ենք նաև «Ժառանգություն» կուսակցության հետ: Տեսականորեն նրանք բոլորն էլ ընդունում են մեր դրույթները, մնում է, որ հաղթահարեն իրենց հավակնությունները: Ով ընդառաջ կգա մեզ, մեր քույրը կամ եղբայրը կդառնա: Միաժամանկ երկար սպասել չենք պատրաստվում: Եթե Հայաստանը դառնա աշխարհի ամենաժողովրդավարական երկիրը, ինչպես նշված է ԱԻՄ նախագծում, դա կլինի նրա ամենամեծ կապիտալը»,- ասաց ԱԻՄ նախագահը:
Նրա խոսքով՝ եթե ՀԱԿ առաջնորդ Լևոն Տեր-Պետրոսյանը և Ռոբերտ Քոչարյանն ընդունեն իր առաջարկը, կորդեգրեն մի ճանապարհ, որը կտարբերվի մինչ այս որդեգրած նրանց ուղուց:
