ՄԱԿ-ի մարդու իրավունքների գերատեսչությունը և միջազգային իրավապաշտպան կազմակերպությունները հայտարարել են Մուամար Քադաֆիի սպանության մանրամասների հետաքննության անհրաժեշտության մասին: Այս մասին հայտնում է «Ազատություն» ռադիոկայանի ռուսական ծառայությունը:
Գերատեսչության ներկայացուցչի խոսքերով` գոյություն ունի Քադաֆիի սպանության առնվազն չորս տարբերակ: Լիբիայի ԱԱԽ-ը հաստատում է, որ Քադաֆին սպանվել է նախօրեին փոխհրաձգության հետևանքով՝ այն բանից հետո, երբ գերի է վերցվել նոր իշխանությունների զորքերի կողմից: Կա նաև վկայություն այն մասին, որ Քադաֆիին սպանել է նրան գերի վերցրած զինվորներից մեկը:
Հիշեցնենք, որ Լիբիայի իշխանությունները հետաձգել են Քադաֆիի թաղումը` դիակի լրացուցիչ հետազոտություն կատարելու համար:
Միևնույն ժամանակ, հակասական լուրեր են գալիս Քադաֆիի տղաներից մեկի` Սեյֆ Ալ-Իսլամի մասին: Համաձայն դրանցից մեկի` նա դեռևս ազատության մեջ է, իսկ մեկ այլ տվյալ վկայում է, որ նա վիրավոր է և գերի է ընկել Լիբիայի արևմուտքում գտնվող Զլիտեն քաղաքում:
