Հայերեն Վիքիպեդիան գոյություն ունի արդեն 5-6 տարի, սակայն եթե այն համեմատենք Հայաստանին և հայերեն լեզվին բնորոշ այլ երկրների հետ, ապա համեմատաբար դանդաղ է զարգանում մի շարք պատճառներով՝ սկսած հայերեն լեզվի կրողների համակարգչային գիտելիքներից, համացանցի հասանելիությունից, կամավորության մշակույթի բացակայությունից և այլն: Նման կարծիք «Առաջին լրատվականի» հետ զրույցում հայտնեց ՏՏ մասնագետ, ազատ նախագծերի մասնակից Ալեքսեյ Չալաբյանը:
Հայերեն Վիքիպեդիան այս պահին ունի 15,600 հոդված: Վերջին կես տարին Հայկական հանրագիտարանի հրատարակչությունն իր կայքի վրա սկսեց տեղադրել որոշ թվային նյութեր, հիմնականում դպրոցական հանրագիտարանի նյութերը: Բացի այդ, մի քանի փոքր Վիքի նախագծեր կան, օրինակ՝ բժշկական, բանասիրական, որը գոյություն ունի կես տարի: 2 շաբաթ առաջ համաձայնություն կնքվեց Հայկական հանրագիտարան հրատարակչության հետ, որ իրենց հրատարակած ԽՍՀՄ հանրագիտարանից մինչև վերջին նյութերը ազատ լիցենզիայի տակ են դրվում, և կարողանում ենք օգտագործել ցանկացած տարբերակով, եթե նշում ենք հեղինակներին և հետագա փոփոխություններն արվում են նույն կերպ: Ա.Չալաբյանի խոսքով՝ դա թույլ կտա խթանել հայերեն Վիքիպեդիայի զարգացումը, քանի որ ստանում ենք մոտ 40 հազար հոդված, որի շնորհիվ ավելի ժամանակակից թեմաներ կներկայացվեն:
«Կարող ենք հույս ունենալ, որ կունենանք նախկինում հրատարակված հանրագիտարանի բնօրինակը, որի մի մասը,- այն, ինչ չկա էլեկտրոնային տարբերակով՝ 4 հատորանի հակիրճ հանրագիտարանը, Հայկական հարց հանրագիտարանը և այլն,- լինելու է wikisource.org նախագծում: Տեխնիկական աշխատանքները արդեն սկսել ենք: Իսկ այն նյութերը, որ կան թվային տարբերակով, հայտնվելու են Հայկական հանրագիտարանի կայքում (http://encyclopedia.am): Թե երբ պատրաստ կլինի՝ դժվար է ասել, բայց մինչև տարվա վերջ արդյունքներ կլինեն: Դա կախված է կամավորների քանակից»:
Ա. Չալաբյանը նշեց, որ նյութերը կարող են տարածվել նաև CD-ների վրա, որ դպրոցներին բաժանվեն, կամ այլ ֆորմատով, որ խելախոսներով (սմարթֆոն) հնարավոր լինի դիտել և այլն: Ընդ որում՝ էլեկտրոնային տարբերակով դա շատ ավելի մատչելի կլինի, քան՝ թղթայինը:
«Մեզ մոտ զարգացումները շատ դանդաղ են ընթանում, հետ ենք թե՛ տարածաշրջանի երկրներից և թե՛ լեզվի տեսակետից համեմատելիս: Այսօր շատ մտահոգիչ է հայերեն լեզվի զարգացումը, որը նման է մահանալու միտումներ ունեցող լեզուների զարգացմանը»,- նշեց Ա. Չալաբյանը:
