«Մանչեսթեր Յունայթեդ»-ի և Անգլիայի հավաքականի առաջատար հարձակվող Ուեյն Ռունիի հորը ձերբակալել են` պայմանավորված հանդիպումներ կազմակերպելու մեղադրանքով: Այս մասին հաղորդում է The Daily Mail-ը:
Բացի 48-ամյա Ուեյն Ռունի ավագից ու նրա 54-ամյա եղբայր Րիչիից, ձերբակալվել են ևս 7 հոգի, որոնց թվում է նաև շոտլանդական «Մոտերուել» ակումբի ֆուտբոլիստ Սթիվ Ջենինգսը:
Հետաքննության կենտրոնում է հայտնվել 2010 թ. դեկտեմբերի 14-ին կայացած Շոտլանդիայի առաջնության «Մոտերուել»-«Հարթս» հանդիպումը: Այն մասին, որ հանդիպումը կարող է պայմանավորված լինել, հայտնել են բուքմեյքերները:
Վերոնշյալ հանդիպումն ավարտվել է «Հարթս»-ի հաղթանակով` 1:2 հաշվով: Հյուրերը գոլերից մեկը խփել են 11-մետրանոց հարվածով, իսկ հանդիպման 82-րդ րոպեին մրցավարին հայհոյելու համար խաղադաշտից հեռացվել է «Մոտերուել»-ի ֆուտբոլիստ Սթիվ Ջենինգսը:
The Daily Mail-ի հաղորդմամբ` Լիվերպուլից ինչ-որ մեկը (այնտեղ են ապրում Ռունիի հարազատները) երկու խաղադրույք է կատարել` յուրաքանչյուրը` 100 ֆունտսթերլինգ: Խաղադրույքի համաձայն` «Մոտերուել»-ի ֆուտբոլիստներից մեկը պետք է հեռացվեր խաղադաշտից: Հաղորդվում է, որ նույն անձը ցանկացել է շատ ավելի մեծ գումարի խաղադրույք կատարել, սակայն բուքմեյքերական ընկերության համապատասխան բաժինն արգելել է ավելին կատարել:
