Ներկայում ՀՀ-ում մշակվում է «Գենետիկորեն փոխված օրգանիզմների մասին» ՀՀ օրենքի նախագիծ, որով կկարգավորվեն գենետիկորեն ձևափոխված օրգանիզմների ներմուծման, մշակման, արտահանման խնդիրները: Բնապահպանության նախարարության Կենսառեսուրսների կառավարման գործակալության պետ Արտաշես Զիրոյանն այսօր ասուլիսում հայտնեց, որ օրենքի նախագիծը քննարկվել է կառավարությունում, ՀԿ-ների հետ, ստեղծվել է 18 մասնագետներից կազմված Ազգային հանձնաժողով, որը թույլտվություն է տալու՝ ներմուծելու գենետիկորեն ձևափոխված օրգանիզմներ կամ դրանք պարունակող մթերքներ:
Նրա խոսքով՝ բնակչության աճը երկրագնդի վրա շուտով կհասնի 7 միլիարդի, և սննդի ապահովման համար՝ ադեն շուրջ 60 միլիոն հա հող դրված է գենետիկորեն մոդիֆիկացված մշակաբույսերի աճեցման տակ:
Կենսաանվտանգության խնդիրը մարդու առողջության տեսակետից տարբեր կարծիքներ է հարուցել, որոնցից հիմնականն այն է, որ ԳՄՕ-ն մեծ վտանգ է ներկայացնում շրջակա միջավայրի համար. «Բացառված չի, որ նման օրգանիզմները խաչասերման միջոցով բույսերին վնաս պատճառեն և ստեղծվեն նոր տեսակներ, որոնք վտանգավոր կլինեն կենդանի աշխարի համար»: Ա. Զիրոյանը նաև նշեց, որ 2004–ին վավերացվել է կենսաանվտանգության ապահովման համաշխարհային փաստաթուղթը, և այսօր արդեն 123 երկիր, այդ թվում՝ Հայաստանը, միացել են դրան:
«Պետք է մաքրել դաշտը, բայց իրավունք չունենք մերժել: Պետք է լաբորատոր հետազոտություններով որոշենք, թե տվյալ մթերքի մեջ ինչքան ԳՄՕ է պարունակվում»,- ասաց Ա. Զիրոյանը` նշելով, որ հանձնաժողովը որոշելու է վտանգավորության աստիճանը:
Ընդ որում, բանախոսը նկատեց, որ կարծիք կա, որ չբերությունը, գիրությունը, ալերգեն երևույթները կապված են դրա հետ: Նա հավաստեց, որ ՀՀ-ն այս ոլորտում շատ չի ուշացել, օրինակ` Ադրբեջանը նույնիսկ չգիտի, թե ինչ է այդ օրենքը:
Պատասխանելով «Առաջին լրավական»-ի հարցին, թե գիտական ի՞նչ տվյալներ կան, մեր երկրում որքա՞ն են տարածված գենետիկորեն ձևափոխված օրգանիզմները, Ա.Զիրոյանը հայտարարեց. «Ոչ մի տվյալ չկա»: Նա հայտնեց, որ դեռ խորհրդային տարիներին ՀՀ-ում գետնախնձորի և ծխախոտի ԳՄՕ են ստացել:
Օրենքի ընդունումից հետո ԳՄՕ ներկրելու և չհայտարարագրելու դեպքում վարչական տուգանքն անձնակազմի համար 200 հզ. դրամ է, ղեկավար կազմի համար` 400 հզ. դրամ, նաև ազատազրկում է նախատեսված, եթե մարդ է մահանում ԳՄՕ-ի ազդեցությունից:
