ՀՀ ԱԺ նախագահ Հովիկ Աբրահամյանի հրավերով հոկտեմբերի 3-ին եռօրյա պաշտոնական այցով Հայաստան է ժամանել Լիբանանի Ազգային ժողովի նախագահ Նաբիհ Բըրրիի գլխավորած պատվիրակությունը:
Ազգային ժողովի այգում Լիբանանի խորհրդարանական պատվիրակության անդամները ծաղիկներ դրեցին 1999թ. հոկտեմբերի 27-ի ոճրագործության զոհերի հիշատակը հավերժացնող հուշակոթողին, որից հետո տեղի ունեցավ ՀՀ ԱԺ նախագահ Հովիկ Աբրահամյանի և Լիբանանի ԱԺ նախագահ Նաբիհ Բըրրիի առանձնազրույցը:
Ողջունելով իր գործընկերոջը ` Հովիկ Աբրահամյանը նշել է, որ պարոն Բըրրիի պաշտոնական այցը Երևան ևս մեկ վկայություն է մեր երկու ժողովուրդների բարեկամության և պետությունների միջև տարբեր բնագավառներում համագործակցությունը զարգացնելու և, հատկապես, միջխորհրդարանական կապերն ամրապնդելու փոխադարձ ցանկության:
Նա համոզմունք է հայտնել, որ Նաբիհ Բըրրիի այցը Հայաստան կնպաստի երկկողմ բարեկամական հարաբերությունների ամրապնդմանն ու խորացմանը քաղաքական, առևտրատնտեսական և երկուստեք հետաքրքրություն ներկայացնող բազմաթիվ այլ ոլորտներում: «Այսօր առանց վարանելու կարելի է փաստել, որ հայ-լիբանանյան հարաբերությունները գտնվում են բարձր մակարդակի վրա և շարունակում են զարգանալ փոխվստահության մթնոլորտում»,-նշել է Հովիկ Աբրահամյանը: Հայաստանի խորհրդարանի ղեկավարը կարևոր համարեց երկկողմ կապերի հետագա զարգացումը բոլոր ուղղություններով:
Շնորհակալություն հայտնելով ջերմ ընդունելության համար` Լիբանանի ԱԺ նախագահը կարևորեց երկու երկրների միջև փոխգործակցության խորացումը, միջխորհրդարանական կապերի ակտիվացումը և տնտեսական կապերի աշխուժացումը: Պարոն Բըրրին բարձր է գնահատել ԱԺ նախագահ Հովիկ Աբրահամյանի 2010թ. ապրիլին Լիբանան կատարած պաշտոնական այցը և նշեց, որ այն նոր թափ հաղորդեց երկկողմ հարաբերություններին և Լիբանանում դրական մեծ արձագանք ունեցավ: «Պետք է նշեմ, որ մեր երկու երկրների հարաբերություններում մշտական կամուրջ են հանդիսանում Լիբանանում ապրող մեր հայ եղբայրները, ովքեր ներգրավված են և քաղաքական և հասարակական կյանքում»,- նշել է Լիբանանի խորհրդարանի ղեկավարը:
Հանդիպման ընթացքում կողմերը անդրադարձան տարածաշրջանային խնդիրներին, երկուստեք կարևորվեց համագործակցությունը միջազգային կառույցներում, քննարկեցին երկկողմ հետաքրքրություն ներկայացնող այլ հարցեր ևս:
Առանձնազրույցից հետո հանդիպումը շարունակվել է ընդլայնված կազմով:
