Իսրայելի զորքերի կողմից Գազայի հատվածում խաղաղ բնակիչների տների ռմբակոծության հետևանքով 38 պաղեստինցի է զոհվել, ևս տասնյակ մարդիկ վիրավորվել են։ Այս մասին հայտնել է Al Jazeera-ն։
Զոհերի մեծամասնությունը գրանցվել է իսրայելական ուժերի կողմից Գազա քաղաքի արևելքում գտնվող Շուջաիյա թաղամասի թիրախավորման հետևանքով։ Նշվում է, որ 55 մարդ վիրավորվել է, ևս 80-ն անհետ կորել են։
Գազայի առողջապահության նախարարությունը հայտարարել է, որ անցումների փակումը և օգնության մուտքի արգելումը բարդացնում են քաղաքացիների առողջական վիճակը, և շուրջ 60 հազար երեխայի կյանք գտնվում է սպառնալիքի տակ։
ՀԱՄԱՍ-ը դատապարտել է Իսրայելի հարձակումը Շուջաիյա թաղամասի վրա։
Իսկ Արևմտյան ափում իսրայելական ուժերը ապրիլի 9-ի լուսադեմին ներխուժել են Նաբլուսից արևելք գտնվող Բալաթա փախստականների ճամբար՝ ստիպելով որոշ ընտանիքների հեռանալ այնտեղից:
Տեղեկություններ կան, որ բանակի մեծ ուժեր ներխուժել են ճամբարի մի քանի թաղամասեր, դիպուկահարներ տեղակայել որոշ տների տանիքներին, այնուհետև փակել ճամբարի բոլոր մուտքերը և ներսում պարետային ժամ սահմանել:
Իսրայելական Haaretz թերթի տեղեկացմամբ՝ իսրայելական բանակը պատրաստվում է Ռաֆահի տարածքը, որը կազմում է Գազայի հատվածի մեկ հինգերորդը, դարձնել «բուֆերային գոտու մի մասը», որտեղ պաղեստինցիներին արգելված է մուտք գործել:
Գազայի առողջապահության նախարարությունը հայտնել է, որ 2023 թ. հոկտեմբերի 7-ից ի վեր առնվազն 50 846 պաղեստինցի է զոհվել Գազայի դեմ Իսրայելի պատերազմի հետևանքով, վիրավորվել է շուրջ 115 729 -ը:
Իսրայելը Գազայի հատվածում ռազմական գործողություններ էր սկսել՝ ի պատասխան պաղեստինյան ՀԱՄԱՍ շարժման զինյալների ներխուժման, որի հետևանքով զոհվել էր 1139 մարդ, գերեվարվել՝ շուրջ 250 մարդ։
